26-Iyulghiche tibetke chet'elliklerning kirishi cheklendi

Birleshme agéntliqining xewer qilishiche, xitay da'iriliri tibetke sayahet orunlashturidighan herqaysi sayahet shirketlirige 1-iyun küni resmiy uqturush tarqitip, 26-iyulghiche tibetke héchqandaq chet'ellikning kirishige ruxset qilinmaydighanliqini uqturghan.

Emma sayahet shirketlirige buning sewebi uqturulmighan. Közetküchilerning qarishiche, bu qarar sichüen aba tibet aptonom oblastida kélip chiqqan weqeler bilen munasiwetlik bolup, xitay da'iriliri 1-iyul kommunist partiye qurulghanliqigha 90 yil toshidighan künlerning aldi-keynide birer weqening kélip chiqishidin ensirigenliktin mezkur qararni chiqarghan bolushi mumkin.

Lixasadiki tibet xelq'ara sayahetchilik orni bu mezgilde rayon'gha kirip-chiqishning peqet chet'elliklerge cheklen'genlikini, buning xitay puqralirini öz ichige almaydighanliqini bildürgen.

Tibette 2008-martta xitay hökümitige qarshi keng kölemlik naraziliq namayishliri yüz bergendin béri, rayon'gha chet'ellik ziyaretchilerning kirip-chiqishi qiyinlashturulghan. Uning üstige yéqindin buyan sichüenning aba tibet aptonom oblastidiki kirti ibadetxanisida naraziliq namayishliri yüz bérip 400 ge yéqin tibet rahibi qolgha élin'ghan we rayon saqchilar teripidin qamal qilin'ghan idi.