95 Хитай ширкити уйғур елида йеңидин иш башлимақчи

Хитайниң мәмликәт бойичә шинҗаңдики хусусий карханиларға ярдәм бериш йиғини түнүгүн үрүмчидә ечилған. Тәңритағ ториниң бу һәқтики хәвиридә билдүрүлүшичә, йиғинда хитайниң гуаңдуң, фуҗйән, җяңсу вә шәндуң қатарлиқ өлкилиридики бир түркүм сода - санаәтчиләр өз ‏- ара учраштурулған вә дөләтниң қурулуш пиланлири тонуштурулған.
Мухбиримиз шоһрәт һошур
2010.08.31

Йиғин нәтиҗисидә 95 ширкәт уйғур елиға җәмий 5 милярд 275 милйон йүән мәбләғ селиш һәққидә келишим түзгән. Буларниң елип баридиған тиҗарәтлири кан байлиқлирини ечиш, асаси қурулуш елип бериш, өй-мүлүк вә тоқумичилиқ қатарлиқ 7 чоң саһәни өз ичигә алған.

Хәвәрдә мәзкур йиғин шинҗаңниң һалқима тәрәққият пиланини әмәлийләштүрүш үчүн дәп тонуштурулған болсиму, йиғинда йәрлик хәлқниң мәнпәәтигә алақидар һечқандақ сөз тилға елинмиған.

Хитай мәркизи милләтләр университетиниң ярдәмчи профессори илһам тохти өткән айда ахбаратқа қилған сөзидә, ичкири өлкиниң мәблиғи вә техникисиниң уйғур хәлқиғә пайда елип кәлмәйдиғанлиқини, әксичә иқтисадий җәһәттин техиму чәткә қеқилишиға түрткә болидиғанлиқини әскәртип, хитай һөкүмитини, уйғур районида қурулуш елип барғанда уйғур хәлқиниң мәнпәәтини нәзәрдә тутушқа чақирған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.