Xitay amérikining kishilik hoquq doklatigha naraziliq inkasi bildürdi

Amérika dölet ishliri ministirliqi 8-aprél küni “2010-Yilliq kishilik hoquq doklati” élan qilip, xitay, rusiye, iran qatarliq bir qisim ellerning 2010-yilidiki kishilik hoquq ehwalini tenqid qilghan idi.
Muxbirimiz ümidwar
2011-04-10
Share

Amérika dölet ishliri ministirliqi 2010-yilidiki xitayning kishilik hoquq ehwalining bir qisim sahelerde nacharlashqanliqini körsetken bolup, buningda öktichi zatlarning qolgha élinip jazalinishi, intérnét ,metbu'at we diniy étiqad erkinlikige bolghan kontrolluqning kücheytilishi, shuningdek tibet we Uyghur qatarliq az sanliq milletlerning kishilik hoquq weziyitining téximu nacharlashqanliqi qatarliq témilargha köp orun bérilgen idi.

Doklatta yene 2009-yilidiki 5-iyul weqesi munasiwiti bilen köp sanda Uyghurlarning tutqun qilin'ghanliqi we iz-déreksiz yoqalghanliqi bayan qilin'ghan idi.

Amérika dölet ishliri ministirliqining doklati élan qilin'ghandin kéyin, 9-aprél küni xitay tashqi ishlar ministirliqining bayanatchisi xongléy naraziliq inkas qayturup, amérikining xitayning kishilik hoquq weziyiti heqqidiki tenqidlirini ret qildi. 10-Aprél küni xitay dölet ishliri kabinéti yene “Amérikining 2010-yilidiki kishilik hoquq ehwali heqqide doklat” élan qilip, amérikidiki kishilik hoquq weziyitini tenqid qildi.

Xitay doklatida amérikidiki jem'iyet amanliqi we intérnétqa bolghan kontrolluq qatarliq tereplerni körsetken hemde amérikini eyibligen.

Xitay dölet ishliri kabinéti her yili amérika dölet ishliri ministirliqi xitayning kishilik hoquq weziyiti heqqide doklat élan qilish bilen teng amérikining kishilik hoquq weziyiti heqqide doklat élan qilishni dawamlashturmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet