Xitay, öktichi zat lyu shawboni 11 yilliq qamaq jazasigha höküm qildi

Kishilik hoquqni qoghdighuchi teshkilatlar bu weqe xitay da'irilirining kéler yili öktichilerni téximu qattiq qolluq bilen bir terep qilidighanliqining signali dep qarimaqta.

Béyjing sheherlik 1 - ottura xelq sot mehkimisi jüme küni höküm chiqirip, lyu shawboning hakimiyetni aghdurush jinayiti sadir qilghanliqini we shu seweblik 11 yilliq qamaq jazasigha höküm qilin'ghanliqini bildürgen. Lyu shawboning soti charshenbe küni échilghan bolup, teptish emeldari lyu shawboni hakimiyetni aghdurush qestidiki "éghir jinayet" sadir qilish bilen eyibligen, sot mehkimisi jüme küni höküm élan qilidighanliqini bildürgen idi.

Amérikining san fransésko shehiridiki kishilik hoquq teshkilatliridin söhbet fondi jem'iyiti, lyu shawbo xitay öktichilirining ichide xitay hökümiti 1997 ‏- yili hakimiyetni aghdurush jinayitini qanun'gha kirgüzgendin béri eng éghir jazalan'ghan kishi bolup qalghanliqini ilgiri sürgen.

Lyu shawboning dilosi xelq'ara jem'iyetning diqqitini qozghap, amérika we yawropa ittipaqining tenqidige uchrighan idi. Yawropa ittipaqi jüme küni bayanat élan qilip, béyjing sot mehkimisining lyu shawboni 11 yilliq qamaq jazasigha höküm qilghanliqini eyibligen shundaqla sotning qarari "xitaydiki pikir erkinliki we adil sotlinish mesilisige qarita endishe peyda qilghanliqi"ni tekitligen.