Xelq'ara kechürüm teshkilati axbarat élan qilip, lyu shawboning nezerbent qilin'ghanliqini eyiblidi

Axbaratta, bir tinch öktichi zatni "bashqurush usuli " bilen nezerbent astida tutup turush, jawabkarda bolushqa tégishlik kishilik erkinlik, bixeterlik we adilane sotlinish hoquqigha da'ir omumi kishilik hoquq ölchemlirige xilap, dep tekitlen'gen hemde xitay da'iriliridin lyu shawboni derhal we shertsiz qoyup bérishke chaqiripla qalmay 2008nizamnamisigha imza qoyghan öktichi zatlargha ighwagerchilik qilishni toxtitish telep qilin'ghan.
 
Xitay chong quruqluqidiki ziyaliylar yéqinda 2008 nizamnamisi dep atalghan asasiy qanun chaqiriqnamisi élan qilip, xitay da'irilirini siyasi islahat élip bérish, xitayda fédératsiyilik tüzümni yolgha qoyushni telep qilghan idi.

Lyu shawbo 2008 nizamnamisini tüzüsh we imza qoyush pa'aliyitini qozghighan shexslerning biri bolup, uzun ötmey iz ‏- déreksiz yoqap ketken idi. Lyu shawboning ayalining ashkarilishigha qarighanda, da'iriler uni béyjing etrapidiki melum bir jayda nezerbent astida tutup turmaqta iken. Xelq'ara kechürüm teshkilati da'irilerning lyu shawboni qaysi jinayet bilen tutup turuwatqanliqini élan qilish kéreklikini, uning adwokat teklip qilishigha ruxset qilishni telep qildi.

Xelq'ara kechürüm teshkilatining béyjingdiki weziyettin xewerdar erbaplardin igilishiche, xitay hökümitining yuqiri qatlimidiki emeldarlar 2008 nizamname herikitining xaraktérini " eksil'inqilabiy munber" dep békitishni oylashmaqta iken. Bezi közetküchiler, eger bu xewer rast bolsa xitay hökümitining 2008 ‏ nizamnamisige imza qoyghuchilargha "shepqetsiz" wastilarni qollinidighanliqini ilgiri sürmekte.