Хитайдики кишилик һоқуққа алақидар хизмәт қилидиған кишилик һоқуқ тәшкилатиниң тор бети һуҗумға учриди

Баш штаби хоңкоңға җайлашқан җуңгодики кишилик һоқуқни қоғдаш тәшкилати дүшәнбә күни бу һәқтә баянат елан қилди вә оз тәшкилати тор бетиниңму шу хилдики һуҗумларға учриғанлиқини билдүрди.

Мәлум болушичә, мәзкур тәшкилатиниң тор бети шәнбә күни чүштин кейин һуҗумға учрашқа башлап, һуҗум уда 14 саәт давам қилған.

Улар елан қилған баянатқа қариғанда, хитайдики кишилик һоқуққа мунасивәтлик хәвәр, учур мулазимити билән шуғуллинидиған тор бәтлиридин сәнйү тори, һоқуқ вә һаятни көзитиш тәшкилатиниң тори, йеңи ера хәвәрләр тори вә хитай мустәқил қәләмкәшләр мәркизиниң тор бәтлири хаккерларниң һуҗумиға учриған.

Җуңгодики кишилик һоқуқни қоғдаш тәшкилатиниң мәзкур баянати, гогул ширкитиниң хитайда һуҗумға учраш мәсилиси түпәйли америка - хитай арисида җиддий дипломатик сүркилиш күчәйгән мәзгилгә тоғра кәлди.

Алдинқи һәптә гугул ширкити хитайдики абунилириниң хаккерларниң һуҗумиға учриғанлиқини, болупму хитайдики кишилик һоқуқ актиплириниң бу хилдики һуҗум нишани қилинғанлиқини оттуриға қойған. Гогул йәнә, әгәр хитайда гугулға қаритилған чәкләш вә һуҗумларға хатимә берилмисә хитайдин чиқип кетидиғанлиқини илгири сүргән иди.

Америка ташқи ишлар министири һиларий клинтон ханим өткән пәйшәнбә күни хитайни интернет алақисини әркин қоюветишкә чақирған. Хитай даирилири бу һәқтә инкас қайтуруп клинтон ханимниң пикрини рәт қилған иди.