Qamaqtiki yazghuchi nurmemet yasinning türmide ölgenliki heqqide xewer tarqaldi

Bu heqtiki uchurlardin qarighanda, bu xewerni eng deslep hazir amérikida turuwatqan xitay qanun proféssori téng byaw tiwittér tori arqiliq ashkarilighan. U nurmemet yasinning shayarda özi yétiwatqan türmide késellik sewebidin 2011-yili ölüp ketkenliki heqqide ishenchlik menbelerdin xewer alghanliqini, emma weqelikning tepsilatigha a'it héchnéme bilmeydighanliqini bildürgen.

Gérmaniye awazi radi'osining Uyghur élining sirtidiki alaqidar organlar we Uyghur élining ichidiki bir qisim ismini ashkarilashni xalimaydighan kishilerdin igilishiche, nurmemet yasinning wapat bolghanliqi heqqidiki xewer bir qanche ay burunla tarqalghan iken. Emma ehwalni sürüshtürgüchiler nurmemet yasinning a'ilisini izdigen bolsimu, qorqunch ichide qalghan a'ilisi bu heqte héchqandaq yip uchi bermigen.

Istansimizning xitayche bölümi bügün bu uchurni tarqatqan qanun proféssori téng byawni ziyaret qilghan bolup, ting biyaw özining bu xewerni bir dostidin anglighanliqini, gerche yüzde-yüz jezmleshtürelmisimu, emma asasen ishenchlik dep qarashqa bolidighanliqini éytqan. U yene, nurmemet yasinning türmide késel bolup qalghinigha xéli uzun bolghanliqini, u türmining shara'itining intayin nacharliqini, nurmemet yasinning a'ile tawabi'atlirining uni yoqlishighimu yol qoyulmighanliqini qoshumche qilghan.

Nurmemet yasin, qeshqer wilayitining maralbéshi nahiyisidin bolup, eyni chaghda özining qisqa hékayiliri we bir qisim shé'irliri bilen nam chiqarghan idi. U 2004-yili qeshqer de “Yawa kepter” namliq prozisini élan qilghandin kéyin, xitay bixeterlik da'iriliri teripidin “Bölgünchilik” bilen eyiblinip qolgha élin'ghan we 2005-yili mexpiy sot bilen 10 yilliq qamaq jazasigha höküm qilin'ghan. Xelq'ara qelemkeshler jem'iyiti we kechürüm teshkilati we shuninggha oxshash nurghun kishilik hoquq organliri nurmemet yasinni türmidin qutuldurup chiqish üchün küch chiqirip kéliwatqan idi.