Кәнт секритари: «‹қошмақ туғқан' лиримиз өзиниң кимлик мәлуматлирини биздин йошуриду»

Мухбиримиз шөһрәт һошур
2019-11-13
Елхәт
Пикир
Share
Принт
Лагер шаһити зумрәт давут «қошмақ туғқан» лири билән. 2018-Йили. Үрүмчи.
Лагер шаһити зумрәт давут «қошмақ туғқан» лири билән. 2018-Йили. Үрүмчи.
Zumret Dawut Teminligen.

Мухбиримиз хитайниң «қошмақ туғқан» сияситиниң иҗраатлирини ениқлиши давамида аталмиш «қошмақ туғқан» лардин хитай тәрәпниң өз кимлик мәлуматлирини қарши тәрәптин йошуридиғанлиқи ашкариланди. Хотәндики бир кәнт аманлиқ мудири өзини икки йилдин буян йоқлап туруватқан хитай туғқининиң пәқәтла исмини билидиғанлиқи, әмма нәдә ишләйдиғанлиқи, немә иш қилидиғанлиқини билмәйдиғанлиқини баян қилди. Уйғур районидин йеқинда чиққан лагер шаһити зумрәт давутму аһалиләр кометитиниң уйғурларни «қошмақ туғқан» лириниң кимлик мәлуматлирини соримаслиқ һәққидә агаһландуридиғанлиқини тәкитлиди.

Һөрмәтлик радийо аңлиғучилар, уйғур районида иҗра қилиниватқан хитайниң «қошмақ туғқан» сияситиниң ғәлитә тәрәплири көпләп ашкариланмақта. Мәлум болушичә, милләтләр өзара чүшиниш вә иттипақлиқни күчәйтишни мәқсәт қилғанлиқи илгири сүрүлгән аталмиш «қошмақ туғқан» лардин хитай тәрәп өзлириниң кимлик мәлуматлирини уйғур туғқинидин мәхпий тутудикән. Шундақ болғачқа хотәндики мәлум бир кәнт секритари өзини 2 йилдин буян йоқлап туруватқан хитай тәрәпниң нәдә ишләйдиғанлиқини та һазирғичә биләлмигән.

Бу туғқандарчилиқта хитай тәрәпкә уйғур аһалиләрниң 7 әвладиғичә кимликини хатириләш, өйигә келип-кетиватқан барлиқ меһманлирини тизимлаш; уларниң каллисида немә ойлап немә хиял қиливатқанлиқини билиш һоқуқи берилгән; әмма уйғур тәрәпкә хитай туғқининиң нәдә ишләйдиғанлиқини билиш һоқуқиму берилмигән. Уйғур аһалилириниң өйигә уштумтут бесип келип «туғқан йоқлаш» һәққи болған хитай «туғқан» лар қарши тәрәпкә өзиниң әсли юрти вә аилә әһвали һәққидә мәлумат бериш мәсулийитини һес қилмиған. 

Йеқинда уйғур районидин чиққан лагер шаһити зумрәт давутму уйғурларниң аталмиш «қошмақ туғқан» лириниң кимликини билмәйдиғанлиқини баян қилди. «Қошмақ туғқан» лардин уйғур тәрәпниң пәқәтла гәп аңлаш мәҗбурийити барлиқи, қарши тәрәптин соал сораш, болупму кимлик мәлуматлирини сораш һәққи йоқлуқини тилға алған зумрәт давут аһалиләр кометитиниң «қошмақ туғқан» лар зиярәткә келиштин бурун уйғур аһалиләрни зиярәт давамида қарши тәрәпниң кимлик мәлуматлирини соримаслиқ һәққидә агаһландуридиғанлиқини ашкарилиди.
Хитай «қошмақ туғқан» ларниң уйғурлар билән гәрчә тамақта, ятақта вә ишта биллә болуп турупму, йәни җувавини биллә түгүп йәватқан, ләғмәнни тәң созуватқан вақтидиму өз бихтәрликидин әндишә қилидиғанлиқи, бу әндишиниң ялғуз шу «қошмақ туғқан» лардила әмәс, бу сәһнини һазирливатқан хитай даирилиридиму мәвҗутлуқи пәрәз қилинмақта.

Пикирләр (0)
Share
Толуқ бәт