بلىنكېن ۋە رۇبىيو خىتاي تۈرمىسىدىكى دوختۇر گۈلشەن ئابباسنىڭ تۇغۇلغان كۈنىدە ئۇنىڭغا ئەركىنلىك تەلەپ قىلدى

مۇخبىرىمىز مەمەتجان جۈمە
2021.06.13
Share on WhatsApp
Share on WhatsApp
بلىنكېن ۋە رۇبىيو خىتاي تۈرمىسىدىكى دوختۇر گۈلشەن ئابباسنىڭ تۇغۇلغان كۈنىدە ئۇنىڭغا ئەركىنلىك تەلەپ قىلدى ئامېرىكا تاشقى ئىشلار مىنىستىرى ئانتونىي بلىنكېن ۋە كېڭەش پالاتاسى ئەزاسى ماركو رۇبىيو خىتاي تۈرمىسىدىكى ئۇيغۇر دوختۇر گۈلشەن ئابباسنىڭ تۇغۇلغان كۈنى مۇناسىۋىتى بىلەن ئېلان قىلغان تۋىتتېر ئۇچۇرىدا، ئۇنىڭ ئائىلىسى بىلەن جەم بولۇشى كېرەكلىكىنى بىلدۈردى. 2021-يىلى 12-ئىيۇن.
Photo: RFA

ئامېرىكا تاشقى ئىشلار مىنىستىرى ئانتونىي بلىنكېن ۋە كېڭەش پالاتاسى ئەزاسى ماركو رۇبىيو خىتاي تۈرمىسىدىكى ئۇيغۇر دوختۇر گۈلشەن ئابباسنىڭ تۇغۇلغان كۈنى مۇناسىۋىتى بىلەن ئېلان قىلغان تۋىتتېر ئۇچۇرىدا، ئۇنىڭ ئائىلىسى بىلەن جەم بولۇشى كېرەكلىكىنى بىلدۈردى.

ئانتونىي بلىنكېن 12-ئىيۇندىكى تۋىتتېر ئۇچۇرىدا مۇنداق دېدى: «بۈگۈن گۈلشەن ئابباسنىڭ 59 ياشقا كىرگەن تۇغۇلغان كۈنى، شۇنداقلا ئۇ شىنجاڭدا ناھەق قامالغان ئۈچىنچى تۇغۇلغان كۈنى. ئۇنىڭ يېقىنلىرى ئۇنىڭ تۇغۇلغان كۈنىنى ئۇنىڭ بىلەن بىللە تەبرىكلەشكە ھەقلىق. ئۇ ئائىلىسىدىكىلەر بىلەن جەم بولۇشى كېرەك.»

گۈلشەن ئابباس خانىم ئامېرىكادىكى ئۇيغۇر ھەرىكىتى تەشكىلاتىنىڭ ئىجرائىيە مۇدىرى روشەن ئابباس خانىمنىڭ ئاچىسى بولۇپ، ئۇ 2018-يىلى 10-سېنتەبىر خىتاي دائىرىلىرى تەرىپىدىن تۇتۇپ كېتىلگەندىن بېرى ئىز-دېرەكسىز غايىب بولغان. بىراق يېقىندا رادىيومىز گۈلشەن ئابباسنىڭ 20 يىللىق قاماق جازاسىغا ھۆكۈم قىلىنغانلىقىنى دەلىللىگەن.

ئۇنىڭدىن باشقا ئامېرىكا كېڭەش پالاتاسى ئەزاسى ماركو رۇبىيومۇ تۋىتتېر ئۇچۇرى ئېلان قىلىپ، گۈلشەن ئابباسنىڭ تۇغۇلغان كۈنىنى تەبرىكلىدى ۋە ئۇنىڭغا ئەركىنلىك تەلەپ قىلدى.

ئۇ مۇنداق دەپ يازدى: «بۈگۈن دوختۇر گۈلشەن ئابباسنىڭ پەقەت ئۇيغۇر بولغانلىقى ئۈچۈنلا شىنجاڭ لاگېردا ئۆتكەن ئۈچىنچى تۇغۇلغان كۈنى. بىز ئۇنىڭ چېھرىنى ھەرگىز ئۇنتۇپ قالماسلىقىمىز، ئۇنىڭ ئەركىنلىكى ئۈچۈن خىتاي كومپارتىيىسىگە داۋاملىق بېسىم قىلىشىمىز كېرەك. ئۇيغۇرلارغا ئەركىنلىك، گۈلشەن ئابباسقا ئەركىنلىك.»

ئۇيغۇر ھەرىكىتى تەشكىلاتىمۇ بۇ مۇناسىۋەت بىلەن ئېلان قىلغان باياناتىدا گۈلشەن ئابباسنىڭ قويۇپ بېرىلىشىنى تەلەپ قىلدى.

ئۇيغۇر ھەرىكىتى تەشكىلاتىنىڭ باياناتىدا نەقىل قىلىشىچە، گۈلشەن ئابباسنىڭ ئامېرىكادىكى ئاكىسى دوختۇر رىشات ئابباس «بىگۇناھ ھالدا تۈرمىگە تاشلانغان سىڭلىسىنىڭ قويۇپ بېرىلىشى ئۈچۈن كۈرەش قىلىشتىن ھەرگىز ۋاز كەچمەيدىغانلىقى» نى بىلدۈردى.

ئۇيغۇر ھەرىكىتى تەشكىلاتى باياناتىدا يەنە «ھېچقانداق بىر ئائىلىنىڭ رەھىمسىز ھەمدە ۋەھشىي ھاكىمىيەتنىڭ قولىدا بۇ قەدەر ئازاب-ئوقۇبەتكە مۇپتىلا قىلىنماسلىقى لازىم» لىقىنى بىلدۈردى ۋە ئۆز تەشكىلاتىنىڭ دوختۇر گۈلشەن ئابباسنىڭ ئائىلىسىدىكىلەر بىلەن بىر سەپتە تۇرۇپ، ئۇنىڭ قويۇپ بېرىلىشىنى تەلەپ قىلىدىغانلىقىنى ئېيتتى.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.