«Шинҗаң иқбал пән-техника ширкити» ниң муавин директори гүлҗамал әбәйдулланиң лагерда икәнлики дәлилләнди

Мухбиримиз шөһрәт һошур
2019-11-20
Елхәт
Пикир
Share
Принт
«Шинҗаң иқбал пән-техника ширкити» ниң икки қурғучисидин бири болған гүлҗамал әбәйдулла ханим.
«Шинҗаң иқбал пән-техника ширкити» ниң икки қурғучисидин бири болған гүлҗамал әбәйдулла ханим.
RFA/Shöhret Hoshur

Вәзийәттин хәвәрдар кишиләрдин бири радийомизға учур йоллап, «шинҗаң иқбал пән-техника ширкити» ниң икки қурғучисидин бири болған гүлҗамал әбәйдулланиң 2017-йили 5-айдин башлап из-дерикиниң йоқлуқини мәлум қилған иди.

Мухбиримизниң бу һәқтә елип барған ениқлашлири давамида гүлҗамал әбәйдулланиң 2001-йили бир қетим җазаланғанлиқи үчүн «сабиқ мәһбуслар» қатарида тутуп кетилгәнлики вә нөвәттә нилқидики бир лагерда икәнлики дәлилләнди.

Вәзийәттин хәвәрдар киши ғайиб гүлҗамал әбәйдулланиң» шинҗаң иқбал пән-техника ширкити» ни акиси абдукерим әбәйдулла билән бирликтә қурғанлиқи вә тәң башқуруватқанлиқини мәлум қилған иди.

Тор архиплирини тәкшүргинимизда «шинҗаң иқбал пән-техника ширкити» ниң 2010‏-йили қурулғанлиқи, үрүмчи шинхуа җәнуби йолиниң 918-номурлуқ бинасида ишханиси барлиқи мәлум болди. «Иқбал-илғар тиҗарәткә ул сал» дегән сәрләвһидә берилгән бир тор еланида ширкәт ишханиси вә директорлириниң телефони йезилған болсиму, әмма бир қанчә күн уда урған телефонлиримиз бағланмиди.

Вәзийәттин хәвәрдар кишиниң елхәт арқилиқ баян қилишичә, гүлҗамал әбәйдулла әслидә куча наһийәсидин болуп, мәзкур ширкәтни акиси абдукерим әбәйдулла билән үрүмчидә қурған вә бир мәһәл башқурғандин кейин никаһ иши билән нилқа наһийәсиниң келәң йезисиға йөткәлгән вә таки2017-йилниң бешиға қәдәр ширкәтниң ишлирини нилқида туруп идарә қилған. Шуңа биз алди билән нилқа наһийәсидики алақидар орунларға телефон қилдуқ.

Нилқа базарлиқ сақчи хадими гүлҗамал әбәйдулла һәққидә мәлумат берәлмиди, келәң йезилиқ сақчи хадими бу һәқтә наһийәлик сода-санаәт бирләшмисидин мәлумат елишимизни тәвсийә қилди. Келәң йезилиқ сода-санаәтни башқуруш понкитиниң хадими дәсләптә бу йезида сода-саһәсидин лагерға әкетилгәнләрниң көплүки, шуңа уларниң тәпсилий әһвалидин хәвәрсизликини ейтти. Арқидин өзиниң лагерға әкетилгән карханичилардин пәқәт бирнила билидиғанлиқи, униң гүлҗамал әбәйдулла икәнлики вә 35 яшлар чамисида икәнликини баян қилди.

Вәзийәттин хәвәрдар киши гүлҗамал әбәйдулланиң 38 яш икәнлики, илгири 2001‏-йили бешиға артқан яғлиқи сәвәблик бир йиллиқ кесилгәнликини мәлум қилған. Сода-саәтни башқуруш идарисиниң мәзкур хадими гүлҗамал әбәйдулланиң тутқунда икәнликини дәлиллигән болсиму, әмма тутулуш сәвәбини дәп берәлмиди. Биз бу хадим тәминлигән алақә учуриға асасән келәң йезисидики бир кәнт сақчисидин мәлумат соридуқ. Бу хадим гүлҗамал әбәйдулланиң илгири бир ишларға четилип қалғанлиқи вә бир йил түрмидә йетип чиққанлиқи, шу сәвәбтин лагерға адәм топлашта униң башта тутулғанлиқини дәлиллиди.

Биз сода-санаәт понкитидики мәзкур хадимдин гүлҗамал әбәйдулланиң нөвәттә қайсий лагерда тутуп турулуватқанлиқини соридуқ. У гүлҗамалниң наһийәдики бир лагерда икәнликини ашкарилиған болсиму, әмма мәзкур лагерниң нилқа наһийә базириниң қайсий қисмида икәнликини сориғинимизда буниң «дөләт мәхпийәтлики» икәнликини илгири сүрүп, җаваб беришни рәт қилди.

Илгирики ениқлашлиримиз давамида атуштики бир кәнт секретари 2017-йили лагерға адәм топлаш башланғанда «сабиқ мәһбус», «сабиқ тутқун» вә «сабиқ гумандар» ларниң әң башта тутқанлиқини ашкарилиған иди.

Һазирғичә болған ениқлашлиримиз давамида «шинҗаң иқбал пән-техника ширкити» ниң муавин директори гүлҗамал әбәйдулланиң нилқа наһийәсидики бир лагерда икәнлики ашкариланди, әмма ширкәтниң баш директори абдукерим әбәйдулланиң ақивити техи мәлум әмәс.

Пикирләр (0)
Share
Толуқ бәт