"Shinjang iqbal pen-téxnika shirkiti" ning mu'awin diréktori güljamal ebeydullaning lagérda ikenliki delillendi

Muxbirimiz shöhret hoshur
2019-11-20
Élxet
Pikir
Share
Print
"Shinjang iqbal pen-téxnika shirkiti" ning ikki qurghuchisidin biri bolghan güljamal ebeydulla xanim.
"Shinjang iqbal pen-téxnika shirkiti" ning ikki qurghuchisidin biri bolghan güljamal ebeydulla xanim.
RFA/Shöhret Hoshur

Weziyettin xewerdar kishilerdin biri radiyomizgha uchur yollap, "Shinjang iqbal pen-téxnika shirkiti" ning ikki qurghuchisidin biri bolghan güljamal ebeydullaning 2017-yili 5-aydin bashlap iz-dérikining yoqluqini melum qilghan idi.

Muxbirimizning bu heqte élip barghan éniqlashliri dawamida güljamal ebeydullaning 2001-yili bir qétim jazalan'ghanliqi üchün "Sabiq mehbuslar" qatarida tutup kétilgenliki we nöwette nilqidiki bir lagérda ikenliki delillendi.

Weziyettin xewerdar kishi ghayib güljamal ebeydullaning" shinjang iqbal pen-téxnika shirkiti" ni akisi abdukérim ebeydulla bilen birlikte qurghanliqi we teng bashquruwatqanliqini melum qilghan idi.

Tor arxiplirini tekshürginimizda "Shinjang iqbal pen-téxnika shirkiti" ning 2010‏-yili qurulghanliqi, ürümchi shinxu'a jenubi yolining 918-nomurluq binasida ishxanisi barliqi melum boldi. "Iqbal-ilghar tijaretke ul sal" dégen serlewhide bérilgen bir tor élanida shirket ishxanisi we diréktorlirining téléfoni yézilghan bolsimu, emma bir qanche kün uda urghan téléfonlirimiz baghlanmidi.

Weziyettin xewerdar kishining élxet arqiliq bayan qilishiche, güljamal ebeydulla eslide kucha nahiyesidin bolup, mezkur shirketni akisi abdukérim ebeydulla bilen ürümchide qurghan we bir mehel bashqurghandin kéyin nikah ishi bilen nilqa nahiyesining kéleng yézisigha yötkelgen we taki2017-yilning béshigha qeder shirketning ishlirini nilqida turup idare qilghan. Shunga biz aldi bilen nilqa nahiyesidiki alaqidar orunlargha téléfon qilduq.

Nilqa bazarliq saqchi xadimi güljamal ebeydulla heqqide melumat bérelmidi, kéleng yéziliq saqchi xadimi bu heqte nahiyelik soda-sana'et birleshmisidin melumat élishimizni tewsiye qildi. Kéleng yéziliq soda-sana'etni bashqurush ponkitining xadimi deslepte bu yézida soda-sahesidin lagérgha ekétilgenlerning köplüki, shunga ularning tepsiliy ehwalidin xewersizlikini éytti. Arqidin özining lagérgha ekétilgen karxanichilardin peqet birnila bilidighanliqi, uning güljamal ebeydulla ikenliki we 35 yashlar chamisida ikenlikini bayan qildi.

Weziyettin xewerdar kishi güljamal ebeydullaning 38 yash ikenliki, ilgiri 2001‏-yili béshigha artqan yaghliqi seweblik bir yilliq késilgenlikini melum qilghan. Soda-sa'etni bashqurush idarisining mezkur xadimi güljamal ebeydullaning tutqunda ikenlikini delilligen bolsimu, emma tutulush sewebini dep bérelmidi. Biz bu xadim teminligen alaqe uchurigha asasen kéleng yézisidiki bir kent saqchisidin melumat soriduq. Bu xadim güljamal ebeydullaning ilgiri bir ishlargha chétilip qalghanliqi we bir yil türmide yétip chiqqanliqi, shu sewebtin lagérgha adem toplashta uning bashta tutulghanliqini delillidi.

Biz soda-sana'et ponkitidiki mezkur xadimdin güljamal ebeydullaning nöwette qaysiy lagérda tutup turuluwatqanliqini soriduq. U güljamalning nahiyediki bir lagérda ikenlikini ashkarilighan bolsimu, emma mezkur lagérning nilqa nahiye bazirining qaysiy qismida ikenlikini sorighinimizda buning "Dölet mexpiyetliki" ikenlikini ilgiri sürüp, jawab bérishni ret qildi.

Ilgiriki éniqlashlirimiz dawamida atushtiki bir kent sékrétari 2017-yili lagérgha adem toplash bashlan'ghanda "Sabiq mehbus", "Sabiq tutqun" we "Sabiq gumandar" larning eng bashta tutqanliqini ashkarilighan idi.

Hazirghiche bolghan éniqlashlirimiz dawamida "Shinjang iqbal pen-téxnika shirkiti" ning mu'awin diréktori güljamal ebeydullaning nilqa nahiyesidiki bir lagérda ikenliki ashkarilandi, emma shirketning bash diréktori abdukérim ebeydullaning aqiwiti téxi melum emes.

Toluq bet