“сақчи һөҗҗәтлири” дики һавагүл абдуреһим “икки йүзлимичилик” билән әйиблинип 7 йиллиқ кесилгән

Муһаҗирәттики тоққузақлиқ кишиләрдин бири, қәшқәр кона шәһәр “сақчи һөҗҗәтлири” дә хатириләнгән һавагүл абдуреһим исимлик тутқунни тонуйдиғанлиқи вә униң хәйригүл исимлик бир бүвим аял билән болған йеқинчилиқи сәвәблик 7 йиллиқ қамаққа кесилип кәткәнликини мәлум қилди. Мухбиримизниң телефон зиярәтлири давамида, һавагүл абдуреһимниң бир кәнт секретари икәнлики вә “икки йүзлимичилик” билән әйиблинип, 7 йиллиқ кесилип кәткәнлики дәлилләнди.

Өзини ашкарилашни халимиған бир тоққузақлиқ муһаҗир, қәшқәр конашәһәр “сақчи һөҗҗәтлири” дики тутқунлар ичидин һавагүл абдуреһимни тонуйдиғанлиқини инкас қилди. “сақчи һөҗҗәтлири” дә қәйт қилинишичә, һавагүл абдуреһим 2018-йили 43 яшта болуп, у булақсу йезисидики ‏14-кәнт партийә ячейкисиниң муавин секретари икән. “сақчи һөҗҗәтлири” дә, һавагүлниң шу йили санаәт райони тәрбийәләш мәркизидә тутуп турулуватқанлиқи қәйт қилинған болсиму, әмма кесилгән-кесилмигәнлики һәққидә мәлумат берилмигән. Мәзкур муһаҗирниң инкасида баян қилинишичә, һавагүл абдуреһим мәһәллисидики хәйригүл исимлик бир бүвим аял билән йеқин өткәнлики, болупму мәһәллидики “сиясий җәһәттин гуманлиқ кишиләр” ни йезилиқ һөкүмәткә мәлум қилиш тәләп қилинғанда, хәйригүлни мәлум қилмиғанлиқи үчүн тутқун қилинған. У, 2018‏-йили “икки йүзлимичилик” билән әйиблинип, 7 йиллиқ кесиветилгән.

Биз мәзкур “сақчи һөҗҗәтлири” вә инкастики учурларниң чинлиқини ениқлаш үчүн, тоққузақтики алақидар сақчи хадимлириға телефон қилдуқ.

Телефонимизни қобул қилған булақсу йезисидики бир кәнт сақчиси, мәзкур йезиниң 14‏-кәнтидә илгири һавагүл абдуреһим исимлик бир кәнт секретариниң болғанлиқини ашкарилиди. Һавагүлниң тәшвиқат ишлирида җанлиқ бир кадир икәнликини әсләп өткән мәзкур сақчи, униң 2018‏-йили тутулуп, шу йили 7 йиллиқ кесилип кәткәнликини дәлиллиди. Әмма у һавагүлниң тутулуш сәвәбидин хәвири йоқлуқи, пәқәт униң “икки йүзлимичилик” билән әйибләнгәнликидин хәвири барлиқини ейтти.

У йәнә инкаста исми тилға елинған вә һавагүлниң йеқини икәнлики илгири сүрүлгән хәйригүл исимлик бүвимни тонумайдиғанлиқини баян қилди. Әмма “сақчи һөҗҗәтлири” дә бир түркүм аялларниң бүвим болғанлиқи үчүн тутқун қилинғанлиқи қәйт қилинған. Тутқундики бүвимләр арисида хәйригүл абла исимлик 56 яшлиқ бирәйләнму бар болуп, бу учур, һавагүлниң инкаста дейилгән тутулуш сәвәбиниң тоғрилиқ еһтималлиқидин бешарәт бәрмәктә. Мәзкур “сақчи һөҗҗәтлири” дә, һавагүл абдуреһимниң “913” номурлуқ рәқәм билән аталған сәвәбләр категорийәси бойичә тутулғанлиқи қәйт қилинған.

Илгирики телефон зиярәтлиримиздә мәкит наһийәсиниң түмәнтал йезисида, исмайил давут исимлик бир тутқунниң “913” категорийәси бойичә тутулғанлиқи вә бу категорийәдикиләрниң асасән телефондин “чатақ” чиққанлар икәнлики мәлум болған иди.

Буниңдин қариғанда, һавагүл абдуреһимниң җазалиниш сәвәблири арисида телефондин чиққан “мәсилә” ниңму барлиқи мәлум болмақта.

Юқирида “сақчи һөҗҗәтлири” дә көрүлгән тутқун һавагүл абдуреһимниң 7 йиллиқ кесилип кәткәнлики һәққидә аңлитиш бәрдуқ.