Jidde ayrodromidin misirgha qayturuwétilgen sidiqullaning iz-dériki yoq

Muxbirimiz méhriban
2019-10-25
Share
Sidiqulla nurmemetning resimi chaplan'ghan UNHCR ning tizimlitish jedwili.
Resimni bir tughqini teminligen.

24-Öktebir radi'omiz Uyghur bölümi mundaq bir uchur tapshurup alduq.

Özini sidiqulla nurmemetning türkiyediki dosti muhemmet dep tonushturghan bir Uyghurning bildürüshige qarighanda, misirda oquwatqan sidiqulla nurmuhemmet 23-öktebir tang étishtin burun sa'et 00:50te misirning qahire ayrodromidin jiddege qarap yolgha chiqip jidde shehirige yitip barghan, lékin jidde ayrodrom saqchiliri uning pasportidin gumanlinip shu küni uni 9:50 ning ayropilanigha sélip misirgha qayturuwetken. Misirning qahire shehirige sa'et 11:20 de chüshken sidiqqulla dostigha uchur yollap özining qahire ayrodromigha kélip bolghanliqini dégen. Axirqi uchurida u yene, misir chégra xadimlirining uni tutup qalghanliqini éytqan we sa'et 12din 40 minut ötkendin bashlap téléfon alaqisi üzülüp qalghan. Muhemmet dosti sidiqullaning téléfonni chégra saqchiliri éliwalghan bolushi mumkin dep guman qilmaqta iken.

Radiyomizgha yetküzülgen pakitliq uchurlar ichide sidiqqullaning qolida xitay pasportning kopiyesidin bashqa birleshken döletler teshkilati musapirlar komitétigha tizimgha aldurghan kinishkisining kopiyesimu bar. Sidiqullaning dosti muhemmetning bildürüshige qarighanda, u 2016-yili sidiqulla bilen el ezherde oqush üchün misirgha kelgen. Emma kelgendin kéyin ezher uniwérsitétida oqushqa qobul qilinmay, qoshumche kurslarda ereb tili we islam dini bilimlirini ögen'gen.

2017-Yili, misir da'iriliri Uyghur oqughuchilarni mejburiy xitaygha qayturushqa bashlighanda, muhemmet türkiyege kéliwalghan, emma so'idiqqulla shu chaghdimu türkiye chégrasidin kirgüzülmey misirgha qaytip yoshurunup yashashqa mejbur bolghan. Sidiqulla misirda xatirjem turush éhtimalliqi bolmighanliqi üchün, hemde iqtisadi jehettimu qiyinchiliq bolghanliqi üchün, se'udidiki bir tughqan nisining yénigha kétish üchün seperge chiqqan iken. Dostining aqiwitidin ensirep qalghan muhemmet xelq'araliq kishilik hoquq organliri we axbatlar hemde Uyghur teshkilatliridin jiddiy yardem sorashni qarar qilghan. 

Ikki kündin buyan sidiqullaning dostliri we tughqanliri uning iz-dérikini qilish üchün misirdin bir adwokat tutqan, adwokatning ulargha éytishiche, u gerche qahire ayrodromigha barghan bolsimu sidiqulla bilen körüshtürülmigen. Emma uning xewer tépishiche qahire da'iriliri sidiqullaning se'udidin qayturuwélishning sewebni sürüshtürüsh üchün tutup qalghanmish. 

Sidiqulla nurmemetni jidde ayrodromida kütüwalmaqchi bolghan newre inisi abdusalamning chüshendürüshiche, sidiqulla nurmemet 24-öktebir newre inisigha jidde ayrodromidin uchur yollap, jidde ayrodromidikilerning uning éléktronluq wiza heqqini neq pul bilen emes banka kartisi bilen tölishi shert dep tosup qalghanliqini éytqan. Newre inisi abdusalam özining kartisi bilen tölesh üchün tamozhnigha kirgen bolsimu emma tamozhna we chégra xadimliri sidiqullani ilgiri bir qétim se'udi chégrasidin bashqa pasport ishlitip kirgen tarixi bar dep gumanlinip élip qalghan. 

Emma abdusalam, jidde ayrodromi xadimlirining yolsizliq qilghanliqini bildürüp "Bu, sidiqullaning tunji qétim se'udi erebistan'gha kélishi, ularning gumani pütünley asassiz" deydu.

Qahire tamozhna we ayrodrom saqchixanilirining téléfoni élinmidi, jidde ayrodrom köchmenler ishxanisigha téléfon ulan'ghan bolsimu, emma yilliq xelq'araliq méhman kütüsh sewiyesi 4 milyon adem qétimdin ashidighan bu xelq'araliq ayrodromda in'glizche bilidighan xadimning chiqmasliqi seweblik so'allirimiz yenila jawabsiz qaldi. 

Igilishimizge qarighanda jiddedin misirgha qayturulghan sidiqullaning iz-déreksiz yoqap ketkenlikidin köpligen xelq'araliq insan heqliri organliri we birleshken döletler teshkilati musapirlar komitéti qatarliq orunlarmu xewer tapqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet