Германийәдә хитайниң көзитиш аппаратлириға техникилиқ ярдәмдә болған Siemens ширкитигә қарши намайиш өткүзүлди

Ихтиярий мухбиримиз әкрәм
2020-07-28
Елхәт
Пикир
Share
Принт
Германийәдики әң чоң санаәт гуруһи болған Siemens ширкитиниң мюнхендики баш штаби алдида өткүзүлгән намайиштин көрүнүш. 2020-Йили 27-июл.
Германийәдики әң чоң санаәт гуруһи болған Siemens ширкитиниң мюнхендики баш штаби алдида өткүзүлгән намайиштин көрүнүш. 2020-Йили 27-июл.
RFA/Ekrem

Германийәдики әң чоң санаәт гуруһи болған Siemensниң мюнхендики баш штаби алдида намайиш өткүзүлди.

27-Июл мәркизи мюнхен шәһиридә болған «явропа шәрқий түркистан бирлики» билән мәркизи гөттинген шәһиридики «хәтәр астидики хәлқләр тәшкилати» ниң бирликтә уюштурушида германийәдики әң чоң санаәт гуруһи болған Siemens ширкитиниң мюнхендики баш штаби алдида намайиш өткүзүлди.

Бу қетимқи намайишни тәшкиллигүчиләрниң бири болған «явропа шәрқий түркистан бирлики» ниң рәиси әсқәрҗан әпәндиниң билдүрүшичә, Siemens санаәт горуһиниң хитай билән болған тиҗарий һәмкарлиқи даирисидә «хитай електрон технологийәси ширкити» биләнму алақиси болуп, Siemens бу хитай ширкитиниң чирай тонуш иқтидариға игә болған көзитиш аппаратлирини ишләпчиқиришиға техника җәһәттин ярдәмлишишни давам қилип кәлмәктә икән. Һалбуки, бу ширкәтниң көзитиш аппаратлири шәрқий түркистан хәлқини назарәт қилиш вәзиписини өтәйдикән.

Намайишчилар көтүрүвалған ай-юлтузлуқ көк байрақ вә лозункидики Siemens ширкитиниң баш директори җойә кайсәрниң чоңайтилған рәсими астиға йезилған «содида виҗдан йоқму, кайсәр әпәнди?» дегән ибариләр кишиләрниң диққитини тартқан. Германийәдики чоң телевизийә қанили болған SDF, йәни «җәнубий германийә телевизийәси» қанили нәқ мәйдандин намайиш хәвирини тарқитип бәлгилик тәсир пәйда қилған. Бу хәвәр 27-июл телевизорда тәкрар-тәкрар көрситилди.

SDF Қанили мәзкур намайиш тоғрисида бәргән хәвиридә «2 милйондин артуқ уйғурлар хитайниң қайта тәрбийиләш мәркизигә қамилип турмақта» дегән җүмлини ишләтти. Хәвәрдә сим тосуқлар билән оралған җаза лагерлириниң көрүнүшлири көрситилип, уйғурларниң нөвәттә еғир дәриҗидә нопус қирғинчилиқи вә мәдәнийәт қирғинчилиқиға дуч келиватқанлиқи, Siemens кә охшаш чоң ширкәтләрниң уйғурлар учраватқан кишилик һоқуқ дәпсәндичиликлирини нәзәргә алмайватқанлиқи, кишилик һоқуқ органлириниң бесимлиридин өзини қачуруватқанлиқи яки хитай ширкәтлири билән болған тиҗарий алақиларда кишилик һоқуқ дәпсәндичиликигә четишлиқ ишларни қилмиғанлиқини илгири сүрүп кәлгәнлики тилға елинди. Филимда йәнә көзлири теңилған, қоллири бағланған уйғурларниң мәҗбури әмгәк үчүн хитайға йөткиливатқан көрүнүшлиригиму орун берилди.

Бу қетимқи намайишқа қатнашқан «хәтәр астидики хәлқләр тәшкилати» берлин ишханисиниң мудири ханно шидлер әпәнди бу һәқтә тохталғанда «аввал германийә, андин пүтүн явропа хитай билән болған һәмкарлиқини қайта көздин көчүрүши керәк,» деди. У мунуларни тилға алди: «германийә башта болуп пүткүл явропаниң хитай билән болған сиясий вә тиҗарий мунасивәтлирини қайтидин көздин көчүридиған вақти кәлди. Германийә вә явропа иттипақиға әза дөләтләр хитай билән сода һәмкарлиқлирида чоқум кишилик һоқуқ дәпсәндичиликлиридин йирақ туруши, уйғурларни нәзәрдин сақит қилмаслиқи лазим».

Бу қетимқи намайишқа иштирак қилған мюнхен шәһиридики җамаәт әрбаблиридин нурәһмәт қарим бу һәқтә тохталғанда, бу намайишниң әтраптики йәрлик хәлқниң диққитини тартипла қалмай, Siemens ширкитидики хизмәтчи хадимларниңму күчлүк диққитини тартқанлиқини әскәртти.

Әсқәрҗан әпәндиниң билдүрүшичә, хитай билән сода һәмкарлиқида болуватқан германийә ширкәтлири аз әмәскән. У сөзидә, бундин кейин бу ширкәтләрниң хитай билән болған һәмкарлиқиға қарши паалийәтләрни раваҗландуруш зөрүрийити барлиқини тилға алди.

Пикирләр (0)
Share
Толуқ бәт