D u q ning 6-nöwetlik pewqul'adde wekiller qurultiyi axirlashti

Ixtiyariy muxbirimiz erkin tarim
2017-11-13
Élxet
Pikir
Share
Print
D u q re'isi dolqun eysa ependi 6-nöwetlik pewqul'adde qurultiyining yépilish nutqi sözlimekte. 2017-Yili 12-noyabir, gérmaniye.
D u q re'isi dolqun eysa ependi 6-nöwetlik pewqul'adde qurultiyining yépilish nutqi sözlimekte. 2017-Yili 12-noyabir, gérmaniye.
RFA/Erkin Tarim

12-Noyabir küni dunya Uyghur qurultiyining 6-nöwetlik pewqul'adde wekiller qurultiyi gérmaniyening myunxén shehiride axirlashti.

D u q ning 6-nöwetlik pewqul'adde qurultiyi 11-ayning 10-künidin 12-künigiche 3 kün dawamlashti. Pewqul'adde qurultayning yépilish murasimi sa'et 14:00 te myunxén shehiride ötküzüldi. Yépilish murasimigha dunya Uyghur qurultiyigha yéngi saylan'ghan her derijilik rehberler we 20 dölettin kelgen 120 etrapida wekil qatnashti. Dunya Uyghur qurultiyi re'isi dolqun eysa ependi yépilish nutqida, bu qétimqi qurultayning muweppeqiyetlik ötkenlikini, birlik-ittipaqliqning éghizdiki quruq sho'ar bilen emelge ashmaydighanliqini, emili xizmetler bilen emelge ashurghili bolidighanliqini tekitlidi.

D u q re'isi dolqun eysa ependi yéngi saylan'ghan rehberlerning birlik-ittipaqliq ichide ishlep, dunya Uyghur qurultiyini "Sherqiy türkistan xelqi kütüwatqan teleplerni emeliyleshtüreleydighan bir teshkilatqa aylanduridighanliqi" ni bildürdi.

Bu qétimqi qurultay jeryanida bezi yéngi teklipler otturigha qoyuldi. Katipliq we xitay ishliri komitéti, ékologiye komitétigha oxshash yéngi komitétlar quruldi.

Qurultay re'isi dolqun eysa ependi nutqida dunya Uyghur qurultiyi dunyaning herqaysi jayliridiki teshkilatlar bilen bashqurush -bashqurulush munasiwitide emes, eksiche hemkarlishish munasiwitide bolidighanliqini, d u q rehberlirining d u q gha eza teshkilatlarning ichki ishlirigha arilishiwalmaydighanliqini jakarlidi.

Buninggha wekiller qandaq qaraydu? qisqisi wekiller dunya Uyghur qurultiyining 6-nöwetlik pewqul'adde wekiller qurultiyigha qandaq baha berdi? bu heqtiki köz qarishini igilesh üchün neq meydanda amérika qoshma shtatliri, yaponiye, qazaqistan, norwégiye qatarliq döletlerdin kelgen wekillerge mikrofonimizni uzattuq. Ular hemme birdek bu qétimqi qurultayning démokratiyelik ölchemlerge toshidighan shekilde ötküzülgenlikini, "Sherqiy türkistan dewasi üchün yéngi bir bashlan'ghuch bolghanliqi" ni bayan qilishti.

Dunya Uyghur qurultiyining 5-nöwetlik qurultiyi 2016-yili 7-ayda parizhda ötküzülüp uzun ötmey dunya Uyghur qurultiyida ichki krizis meydan'gha kélish bilen birlikte Uyghur diyarining weziyitimu tarixta körülüp baqmighan bir shekilde éghirlashqan bir weziyette, d u q bu weziyetni nezerde tutup, 6-nöwetlik pewqul'adde qurultay chaqirish qarari maqullan'ghan idi.

Toluq bet