Dunya Uyghur qurultiyi kéngeytilgen téléfon yighini chaqirdi

2014-Yilining kirishi bilen dunya Uyghur qurultiyi 2014-yilliq xizmet pilanlirini emeliyleshtürüsh üchün dunya Uyghur qurultiyining kéngeytilgen téléfon yighini chaqirdi.

26-Yanwar küni amérika waqti sa'et 10 da bashlan'ghan yighin'gha d u q re'isi rabiye qadir xanim, mu'awin re'isliri, ijra'iye komitéti mudiri, bash katip, herqaysi komitét mes'ulliri we herqaysi döletlerdiki wekilliri qatnashti. Téléfon yighinida dunya Uyghur qurultiyining 2-ayning 21-küni dunya ana til bayrimi munasiwiti bilen firansiyening paytexti parizhda uyushturidighan pa'aliyetliri, 3-ayda jenwede ötküzülidighan birleshken döletler teshkilati insan heqliri yighinigha teyyarliq qilish, 4-ayda gérmaniyede ötküzmekchi bolghan “Uyghur yash rehberlerni terbiyilesh kursi” we 5-ayning 19-künidin 21-künigiche gérmaniyening paytexti bérlinda chaqirilmaqchi bolghan “Xitay hökümitining sherqiy türkistanliq musulmanlargha qaratqan diniy bésimi: sewebler, paji'eler we aqiwetler” mawzuluq xelq'araliq muhakime yighini toghrisida muzakire élip bérilghan.

Biz bu yighin toghrisida téximu tepsiliy melumat igilesh üchün dunya Uyghur qurultiyi ijra'iye komitéti mudiri dolqun eysa ependi we mu'awin re'isi séyit tümtürk ependiler bilen söhbet élip barduq.

Dolqun eysa ependi 2014-yilining Uyghurlar üchün intayin muhim ikenlikini, bu yildimu Uyghurlarning peryadini dunyagha anglitishni dawamlashturidighanliqini bayan qildi. Séyit tümtürk ependi bolsa her kesip, her sahediki Uyghurlarning öz dawasigha ige chiqishi we d u q ni qollap quwwetlishi kéreklikini bayan qildi.