Җу йүңкаңниң җинайи пакитлири ашкарилинишқа башлиди

Мухбиримиз меһрибан
2013.12.06
ju-yungkang-305.jpg Хитай мәркизи комитет сиясий бюросиниң даимий әзаси җу юңкаң хитай икки чоң йиғининиң ечилиш мурасимида. 2012-Йили 5-март, бейҗиң.
AFP


Җу юңкаңниң қолға елинғанлиқ хәвири тарқалғандин кейин, униң қолға елинишидики җинайи пакитларму ашкарилинишқа башлиди. Буларниң ичидә җу йүңкаң сичүән өлкисиниң партком секритари болуп турған мәзгилидә, илгирики аялини аптомобил соқулуш вәқәси пәйда қилип, қәстләп өлтүргәнликигә даир пакитлар вә җу йүңкаңниң бивастә пиланлиши билән пәйда қилинған ши җиңпиңни икки қетим қәстләш вәқәси қатарлиқлар, җу йүңкаңниң парихорлуқ қилмишлиридинму еғир болған җинайи пакитлири сүпитидә чәтәлләрдики хитай тор бекәтлири вә хәлқара мәтбуатларда елан қилинишқа башлиди.

Чәтәлләрдики хитай хәвәр мәнбәлири 5 - ,6 - декабир күнлири җу йүңкаң аилисидики йәнә башқа әзаларниңму қолға елинғанлиқини вә җу йүңкаңниң җинайи қилмишлириға аит техиму җиқ пакитларниң ашкариланғанлиқини хәвәр қилди.

Бошүн ториниң 6 - декабирдики хәвиридә дейилишичә, 5 - декабир күни бейҗиңдин әвәтилгән бихәтәрлик сақчилири сиясий қанун комитетиниң сабиқ башлиқи җу йүңкаңниң икки иниси вә сиңлисини уларниң җяңсу өлкисидә ишләватқан ширкитидин елип кәткән. Хәвәрдә йезилишичә, бу җу йүңкаң вә униң кейинки аяли 1 - декабир күни бейҗиң җуңнәнхәйдики өйидин елип кетилгәндин кейин, мушу һәптә ичидә җу җәмәти аилисидики башқа әзаларниңму тутқун қилиниши болуп, бихәтәрлик хадимлири йәнә җу җәмәтиниң ширкитидин нәччә милйон қиммитидики нәқ пул вә пул чекиниму елип кәткән.

Җу йүңкаңниң қолға елинишидики җинайи пакитлар һәққидә елан қилинған хәвәрләрдә дейилишичә, нөвәттә хитай мәркизи интизам тәкшүрүш комитети җу йүңкаңниң җинайи қилмишлириға аит пакитларни ашкара елан қилмиған болсиму, әмма әһвалдин хәвәрдар болған хитайниң юқири дәриҗилик әмәлдарлири чәтәлләрдики хитай тор бекәтлиридә җу йүңкаңға артилған җинайи пакитларни ашкариливәткән.

Бошүн ториниң 5 - декабирдики хәвиридә дейилишичә, җу йүңкаңниң илгирики аялини қәстләп өлтүрүшкә қатнашқан униң икки шопури бу йил 8 - айниң ахири ишләватқан йери ғалбийәт нефитликидин тутуп келингән болуп, бундин 10 йиллар илгири, җу йүңкаң сичүән өлкисиниң партком секритари болуп турған мәзгилидә қол астидики әмәлдар го юңшяңға буйруқ қилип, аптомобил суқулуш вәқәси пәйда қилиш арқилиқ илгирики аялини қәстләп өлтүргән. Әйни вақитта аптомобил қазасини пәйда қилған икки нәпәр шопур қораллиқ сақчилар болуп, бу иккәйлән вәқәдин кейин,қолға елинип 15 йилдин 20 йилғичә болған қамақ җазасиға һөкүм қилинған болсиму, әмма 3 - 4 йилдин кейинла қоюп берилип, һәр иккиси ғалбийәт нефитликигә хизмәткә орунлаштурулған. Иккәйләнниң бири аптомобил калониниң башлиқи, йәнә бири кейин сәндуң нефитликигә йөткилип муавин дериктор қилинған. Бошүн ториниң хәвиридә йәнә мундақ баянлар берилгән “җу йүңкаңниң сичүәндики 2 - оғли җу хән анисини қәстләп өлтүрүлди дәп қариғачқа, дадиси җу йүңкаң билән болған барлиқ мунасивәтни үзгән вә чеңдуда бир кичик китаб дукини ечип тирикчилик қилған. Нәвриси туғулғандин кейин җу йүңкаң 2 - оғли җу хәнниң өйигә келип оғул нәврисини көрүшни тәләп қилған болсиму, әмма җу хән дадисиға өзиниң уни мәңгү көрүшни халимайдиғанлиқини ейтқан.”

Тәйвән мәркизи агентлиқиниң 6 - декабирдики хәвиридә дейилишичә, “хитай мәркизи һөкүмитиниң нөвәттә җу йүңкаңға артидиған җинайити, сияси өзгириш қозғап бо шиләйни тәхткә чиқириш арқилиқ, өзи пәрдә арқисида туруп бивастә башқуруш; нөвәттики хитай рәиси ши җиңпиңни қәстләп өлтүрүшни пиланлаш; һесабсиз дәриҗидики парихорлуқ қилмишлири вә илгирики аялини қәстләп өлтүрүш қатарлиқ көп хил җинайәтләр болуши мумкин икән.

Бүгүнки хәлқара мәтбуатлар вә чәтәлләрдики хитай хәвәрлиридә йәнә ши җиңпиңниң 5 - декабир күни америка муавин президенти җов байдин билән елип барған сөһбитиниң 5 саәттин артуқ давам қилғанлиқи алаһидә тилға елинип, иккәйләнниң мухбирлардин хали елип барған сөһбитидә,җов байдинниң, бо шиләйниң қол астидики әмәлдар ваң лиҗүнниң 2012 - йили америка консулханисиға киривалған чағда бо шиләй вә җу йүңкаңниң җинайи пакитлири тоғрилиқ қандақ материялларни тапшурғанлиқи һәққидики пәрәзләрму оттуриға қоюлди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.