Керийәдә дохтурханидин қачқан ата: сәвәбиңлар билән қутулуп қалдуқ, әмма әндишимиз йәнә бар

Мухбиримиз шөһрәт һошур
2014.01.07
Share on WhatsApp
Share on WhatsApp
uyghur-ayal-baliliri-bilen.jpg Балилирини ойнитиватқан уйғур аял. 2012-Йили 1-июл, қәшқәр.
PHOTONONSTOP

Керийәниң ариш йезисида туғулуш алдидики 6 нәпәр бовақниң ана қарнида өлтүрүлгәнлики һәққидә учурлар иҗтимаий таратқуларда җәмийәткә ашкариланғандин кейин, мәзкур йезиға телефон қилип әһвал игилигән идуқ. Йезиниң мәсул рәһбәрлири өзлири садир қилған һамилә қәтлә қилиш вәқәсини иқрар қилған; вәқәниң дуняға ашкариланғанлиқидин үмидләнгән мәтқурбан нури һамилидар аялини елип дохтурханидин қачқан иди. Бүгүн йәни аридин бир һәптә өткәндә мухбиримиз мәтқурбанға қайта телефон қилип, уларниң нөвәттики әһвалини сориди. Мәтқурбан нури дохтурханидин қачқандин кейин даириләрниң өзлирини издимигәнликини, нәтиҗидә һамилиниң һазирғичә аман туруватқанлиқини ейтип мухбиримизға миннәтдарлиқ билдүрди. Әмма у йәнә, мәһәллидә тарқалған бәзи миш-миш гәпләр сәвәбидин һамилиниң тәқдиридин йәнила әндишә қиливатқанлиқини баян қилди.

Биз бүгүн алди билән 8 айлиқ балиси чүшүрүветилгән мәттурсун қавулни зиярәт қилдуқ. Мәттурсун өткәндә зияритимизни қобул қилғандин кейин өзиниң һечқандақ бир аваричиликкә учримиғанлиқини баян қилиш билән бирликтә, шуниңдин кейин бала чүшүрүш вәқәсиниң өзи тәвә кәнттә йүз бәрмигәнликини, һәтта дохтурханиға апирилған мәтқурбан нуриниң аялиниң оператсийидин қутулуп қалғанлиқини ейтти.

Соал: ундақта һазирғичә кәнт яки йеза рәһбәрлири силәрниң балаңларни чүшүргинимиз хата бопту дегән гәпни қилмидиму?
Җаваб: яқ болмиди. Һечким бу һәқтә чүшәндүрүш бәрмиди. Дохтурханиға апарғучә мөкүнгән йеримиздин издәп тепип қараңғуда мәҗбурий қол қойдурған шу кадирларниң һечқайси йоқ, чатиқи болмиди.
Биз өткән һәптә дохтурханидин қачқан мәтқурбан нурини зиярәт қилдуқ:

Соал: қандақ әһвалиңлар һазир?
Җаваб: яхши, өйдә олтурдуқ.

Соал: аялиңизни қайта дохтурға апиримиз дәп кәлмидиму?
Җаваб: кәлмиди, шу күндин кейин мени издигән болмиди; шуңа өйгә қайтип келип дәм еливатимиз.

Соал: аялиңизниң кәйпияти қандақ? қорқуп кәткән әһвал барму?
Җаваб: яқ ундақ әһвалму йоқ. Илтипатиңлар билән аман қалдуқ, өйдин чиқмай олтуруптимиз.

Соал: дохтурханидин қечип кәткиниңлар хата болди дәп кайиғучилар болмидиму, башлиқлардин?
Җаваб: яқ болмиди. Шу сиз телефон қилған күни, мән дохтурханидин қечип чиқип кәткәндин кейинла сун шуҗи(йезилиқ партком секретари) телефон қиптикән, кәнт башлиқиға, пулни қайтурувелиңлар дәп...

Соал: бу немә пул?
Җаваб: биз дохтурханиға барған күни 2400 сом төлигән дохтурханиға, шу пулни дохтурханидин қайтурувапту, биз бала аман қалғандикин мәйли дедуқ.

Соал: дохтурханиниң бала чүшүргән пулини сиз өзиңиз төлидиңизму? башқиларму шундақму?
Җаваб: сәккиз айлиқ балини чүшүрүшкә 3500 сом төләпту, ата-аниси шундақ дәйду; башқилири 900 сом, 1000 сомдин өткүздуқ дәйду.

Соал: әмисә мумкин болса шу аилиләргә төлитиватқан, болмиғанда кәнт өзи төлигән яки толуқлиған гәпкән-дә?
Җаваб: шундақ, шундақ охшайду.

Соал: йәнә әндишәңлар барму?
Җаваб: түнүгүн бир миш-миш гәп чиқти. “силиниң балини чүшүрүвәтмисә болмайдикән” дәп, “кәлсун балини алимән дегүчә мени атсун” дәп олтурдум.

Соал: бу гәп қәйәрдин чиққан гәп?
Җаваб: бүгүн наһийәдә бир пиланлиқ туғут йиғини ечилиптимиш, пүтүн аял мудирлар қатнишипту, бундин кейин 5 айлиқтин чоң бовақларни чүшүрмәймиз, 5 айлиқтин төвәнләрни чүшүрүверимиз дәптумиш.

Соал: бу, коча париңиму, рәһбәрләрдин аңлидиңизму?
Җаваб: мәһәллидики гәп.

Соал: силәр дохтурханидин чиқип кәткәндин кейин силәрдин башқиларниму дохтурханиға апарған, чүшүргән әһвал болдиму, аңлидиңлиму?
Җаваб: болмиди; ундақ гәпни аңлимидуқ.

Юқирида, өткән һәптә керийәдә һамилини өлүмдин қутулдуруш үчүн дохтурханидин қачқан аилиниң нөвәттики әһвали һәққидә мәлумат бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.