Yawropa sherqiy türkistan birlikining 20-nöwetlik saylimi élip bérildi

Ixtiyariy muxbirimiz ekrem
2017-01-16
Élxet
Pikir
Share
Print
Yawropa sherqiy türkistan birlikining 20-nöwetlik saylimida, mezkur teshkilatning qurghuchi ezaliridin biri bolghan erkin aliptékin ependi we d u q bash katipi dolqun eysa ependiler riyasetchilik qilmaqta. 2017-Yili 15-yanwar, myunxén.
Yawropa sherqiy türkistan birlikining 20-nöwetlik saylimida, mezkur teshkilatning qurghuchi ezaliridin biri bolghan erkin aliptékin ependi we d u q bash katipi dolqun eysa ependiler riyasetchilik qilmaqta. 2017-Yili 15-yanwar, myunxén.
RFA/Ekrem

Merkizi gérmaniyening myunxén shehirige jaylashqan bolghan yawropa sherqiy türkistan birliki teshkilatining 20-nöwetlik saylimi démokratik usulda élip bérildi.

Qurulghinigha 27 yil bolghan yawropa sherqiy türkistan birliki teshkilatining 20-nöwetlik saylimi 15-yanwar küni dunya Uyghur qurultiyi xizmet binasida élip bérildi. Saylamgha Uyghur wekilliridin toluq 50 kishi qatnashti. Saylamgha mezkur teshkilatning qurghuchi ezaliridin biri bolghan erkin aliptékin ependi we d u q bash katipi dolqun eysa ependiler riyasetchilik qildi. Teshkilatning qurghuchi ezaliri hemde d u q ning myunxéndiki rehberlirimu saylamgha ishtirak qildi.

Salay resmiy bashlinishtin ilgiri, re'is namzati bolghan esqerjan we turghunjan ependiler özliri re'is bolsa emelge ashuridighan ishlarni tilgha élip, saylam riqabiti peyda qildi.

Ikki neper re'is namzatining nutqidin kéyin saylamgha qatnashqan 50 kishi démokratik usulda bilet tashlash arqiliq yawropa sherqiy türkistan birliki teshkilatining 20-qétimliq re'isini saylap chiqti.

D u q diniy ishlar komitétining mudiri, gérmaniyediki diniy zatlardin turghunjan alawudun hajim üstün awaz bilen teshkilatning re'isi bolup saylandi. Yawropa sherqiy türkistan birliki teshkilatigha re'is bolup saylan'ghan turghunjan alawudun hajim ziyaritimizni qobul qilip, re'is bolghandin kéyinki tesiratlirini bayan qilip ötti.

Re'is saylimidin kéyin, mezkur teshkilatning ikki neper mu'awin re'isi, bash katipini öz ichige alghan 11 neper idare hey'iti saylam ehlining qol kötürüp awaz bérishi bilen teshkilatning rehberlik yadrosini teshkil qildi.

Teshkilatning qurghuchisi we sabiq re'isi erkin aliptékin ependi bu munasiwet bilen ziyaritimizni qobul qilghanda, bu qétimqi saylamning köngüldikidek bolghanliqini tilgha aldi.

D u q bash katipi dolqun eysa ependimu bu qétimqi saylamning démokratik prinsiplargha emel qilghan asasta élip bérilghanliqini eskertti.

Melum bolghinidek, yawropa sherqiy türkistan birliki teshkilati gherb elliride qurulghan tunji Uyghur teshkilati bolup, 1990-yili erkin aliptékin bashchiliqidiki 7 neper Uyghur myunxén shehiride qurup chiqqan, 2015-yili bu teshkilat qurulghanliqining 25-yilliq xatirisi myunxén shehiride daghdughiliq ötküzülgen idi.

Toluq bet