Ғулҗа наһийисидики “йепиқ тәрбийиләш мәркизи” гә 1500 әтрапида сиясий гумандар соланған

Бултурдин башлап уйғур райониниң көп қисим җайлирида сиясий гуман билән тутқун қилинған бир қисим кишиләр тәкшүрүш нәтиҗисидә қилмиши җинайәткә тошмиған әһвалда йәнә қоюветилмәстин аталмиш қанун-түзүм тәрбийә мәркәзлиригә қамивелинған иди. Муһаҗирәттики бәзи уйғур көзәткүчиләр, шәкли өзгәргән қамақхана дәп нам бәргән бу хил мәркәзләрдин ғулҗа наһийисидә бәши бәрпа болған. Ашкарилинишичә, бу мәркәзләрдә нөвәттә 1500 әтрапида сиясий гумандар солинип ятмақта. Әҗәплинәрлики, ғулҗа наһийәси бу тәрбийәләш мәркәзлириниң бир йилға йәтмигән вақит ичидә 3 қетим намини өзгәрткән. Мухбиримизниң зияритини қобул қилған мәзкур тәрбийиләш мәркизиниң 3 нәпәр оқутқучиси, өзлири хизмәт қиливатқан тәрбийәләш мәркизиниң намини дәп берәлмиди. Улар йәнә өз “курсант” лириниң тәрбийилинишини қачан тамамлайдиғанлиқидинму хәвәрсизликини ашкарилиди.

Ғулҗа наһийисидә миңларчә кишиниң тәрбийиләш мәркизи нами астидики шәкли өзгәргән қамақханиларда қамилип йетиватқанлиқи һәққидики инкаслар радийомизға кәлгәндин кейин, мәзкур наһийәдики алақидар орунларға телефон қилдуқ. Наһийидики сиясий қанун ишханисиниң бир хадими, ғулҗа наһийәсидә бу хил тәрбийиләш мәркизидин 5 орунда барлиқини, буларда сиясий қанун вә маарип саһәсидики кадирларниң дәрс өтүватқанлиқини; тәрбийиләш мәркәзлиридин биридә мәхсус аялларниң тәрбийилинидиғанлиқини ашкарилиди.

Аялларни тәрбийиләш мәркизиниң оқутқучиси, өзи вәзипә өтәватқан мәркәздә аталмиш курсантлар йешиниң 15 яш билән 65 яш арисида икәнликини ашкарилиди. У йәнә 5 тәрбийәләш мәркизидә аз дегәндә 45 синип барлиқини, курсантлар саниниң 1400-1500 арисида икәнликини паш қилди.

Мәлум болушичә, наһийилик партийә мәктипи, кәспий толуқ оттура мәктәп, ашлиқ идариси қатарлиқ орунларда тәсис қилинған бу курсларда җаза муддитини түгәткән мәһбуслар, аталмиш әсәбийлик идийиси билән юқумланғанлар, қанунсиз оқуш вә оқутуш билән шуғулланған яки униңға имкан яритип бәргәнләр болуп, сиясий идийисидә мәсилә бар дәпла қаралған кишиләр йиғивелинған. Буларға нөвәттә сиясий қанун дәрслири берилгәндин башқа, хитай тили вә бир қисим кәспий техника мәлуматлириму берилидикән.

Әҗәблинәрлики, даириләр бу тәрбийәләш мәркәзлирини дәсләптә йепип тәрбийиләш мәркизи дәп атиған, кейин буни немә сәвәбтиндур тоғра көрмигән. Даириләр мәркәзниң намини кәспий җәһәттин тәрбийиләп ишқа орунлаштуруш мәркизи дәп атиған; даириләр йеқинда бу намниму әпсиз көрүп “кәспий маһарәт билән тәрбийиләш мәркизи” дәп өзгәрткән. Курсниң намидики турақсизлиқ, курс муддитидики ениқсизлиқ вә дәрсләрниң бир-биригә уйғунсизлиқи сәвәбидин, курста йетәкчи рол ойнаватқан оқутқучилар өзлири ишләватқан мәктәпниң йәни курсниң намини дәп бериштиму қийналди.

Гәрчә, даириләр мәктәпниң намида, униң қамақханиға охшаш характерини йошурушқа тиришқан болсиму, әмма мәктәпниң кәйпияти курсниң әсли маһийитини йошуралмиди. Телефон зияритимиз давамида, курсантларниң “биз җуңхуа хәлқ җумһурийитиниң пуқралири” дәп башлиған қәсәмяд сөзлири аңланди.

Юқирида ғулҗа наһийисидә 1500 нәпәр әтрапида сиясий гумандарниң аталмиш тәрбийәләш мәркәзлиридә солақлиқ икәнлики һәққидә мәлумат бәрдуқ.