Хитайниң уйғур районидики сиясий йиғинлириниң күткинидин әксичә нәтиҗә бериватқанлиқи ашкариланмақта

Биз түнүгүнки программимизда 28-декабир күни қарақаш парткомға һуҗум қилған гумандарларниң һуҗумни өз тәвәликидики сиясий өгинишни түгитип чиққандин кейин елип барғанлиқи һәққидә учур бәргән идуқ.

Мәлум болушичә, уйғур райониға нисбәтән сиясий йиғиндин чиқип һуҗумға қатнишиш тунҗи қетим йүз бериватқан әһвал әмәс. Буниң йәнә бир мисали 2015-йили зилзилә пәйда қилған 18-сентәбир бай көмүркан һуҗумидур.

Бай көмүркан һуҗумчилиридин мәмәт әйса һуҗумдин аввал бир һәптилик сиясий тәрбийәни тамамлиған. Бу тәрбийә униңға тәсир қилмиғандин кейин, йәрлик әмәлдарлар уни сақчиханиниң тәрбийилиши үчүн йезилиқ сиясий қанун комитетиға өткүзүп бәргән, әмма сақчиханиларда бош орун болмиғачқа амалсиз қоюветилгән.

Бай көмүркан һуҗумчилиридин йәнә бири мәхмут турсунму сиясий өгинишкә толуқ қатнашқан, һәтта у хитай секретар тәрипидин усул ойнашқа мәҗбурланған.

Биз, хитайниң нөвәттә елип бериватқан бу түрлүк сиясий йиғинлириниң тәсири вә үнүми һәққидә дуня уйғур қурултийиниң тәшвиқатқа мәсул муавин рәиси пәрһат муһәммәд әпәнди билән сөһбәт елип бардуқ.

У юқириқи пакитларға асасән, хитайниң сиясий йиғинлириниң әксичә нәтиҗә бериватқанлиқини илгири сүрди. У бу нуқтида йәнә, хитайниң 2009-йилидики 5-июл вәқәсидин кейин дуня уйғур қурултийи вә рабийә қадир ханимни кәң-көләмлик қарилаш тәшвиқати елип барғанлиқини, әмма рабийә ханим вә қурултайниң шан-шәрипиниң мәзкур тәшвиқатлардин кейин, бурунқидинму нәччә һәссә ашқанлиқини вә бу вәзийәтни чәтәлгә қечип чиққан сиясий панаһланғучиларниң баянлири вә кәчүрмишлиридин уққанлиқини оттуриға қойди. У йәнә сөз арисида 5-июл вәқәсиниң алди-кәйнидә хитайниң қудрәтлик ахбарат қошуниниң чәтәлдики чәклик уйғур ахбарат орунлириға мәғлуп болғанлиқини илгири сүрди.