Шинҗаң университетидин профессор абдукерим рахман, арслан абдулла вә раһилә давутниң тутқун қилинғанлиқи дәлилләнди

Мухбиримиз шөһрәт һошур
2018-09-13
Елхәт
Пикир
Share
Принт
Ш у а р хәлқ һөкүмити мәслиһәтчиләр ишханисиниң сабиқ мудири, шинҗаң университети филологийә институтиниң сабиқ мудири, профессор арслан абдулла әпәнди(оңда). Шинҗаң университети филологийә институтиниң профессори, доктор йетәкчиси абдукерим рахман әпәнди(солда).
Ш у а р хәлқ һөкүмити мәслиһәтчиләр ишханисиниң сабиқ мудири, шинҗаң университети филологийә институтиниң сабиқ мудири, профессор арслан абдулла әпәнди(оңда). Шинҗаң университети филологийә институтиниң профессори, доктор йетәкчиси абдукерим рахман әпәнди(солда).
RFA/Qutlan

Йеқинда аңлиғучилиримиздин бири радийомизға инкас йоллап, шинҗаң университетидин аз дегәндә 56 оқутқучи вә тәтқиқатчиниң йиғивелиш лагериға елип кетилгәнликини мәлум қилған иди. Өткән һәптә америкидики уйғур паалийәтчи, шинҗаң университетиниң сабиқ оқутқучиси қутлуқ алмас әпәнди иҗтимаий таратқуларда гуваһлиқ баянати елан қилип, шинҗаң университетидики сабиқ хизмәтдашлиридин 5 кишиниң лагерда икәнликигә гуваһлиқ бәрди.

Мухбиримизниң шинҗаң университети универсал түзәш қоманданлиқ мәркизидин әһвал игилиши давамида дәсләпки қәдәмдә абдукерим рахман, арслан абдулла вә раһилә давут қатарлиқ даңлиқ профессорларниң тутқун қилинғанлиқи дәлилләнди.

Биз учурниң тоғра-хаталиқини ениқлаш үчүн шинҗаң университети мәктәп мәмурийити ишханисиға телефон қилдуқ. Биз телефонимизни алғучидин профессор арслан абдулла билән абдукерим рахманниң «тәрбийә» ләшкә әкетилгәнлик әһвалини кимдин ениқлишимиз керәкликини сориғинимизда у филологийә институти билән мәктәп қоманданлиқ ишханисидин мәлумат соришимизни ейтти. Шинҗаң университети универсал түзәш қоманданлиқ ишханисидики бир хадим дәсләптә өзиниң бу һәқтә мәлумат берәлмәйдиғанлиқини ейтти. У арқидин алақидар рәһбәрләрдин йолйоруқ алғандин кейин, соаллиримизниң бир қисмиға җаваб бәрди, әмма көп қисмиға җаваб беришни рәт қилди. У бу җәрянда профессор арслан абдулла билән абдукерим рахманниң тутулғиниға хели узун болғанлиқини, әмма кимләр тәрипидин немә үчүн әкетилгәнлики һәққидә мәлумат берәлмәйдиғанлиқини ейтти.

Соал: кимләр тәрипидин тәкшүрүлгинини дәп берәлмигиниңизгә асасән арслан абдулланиң тутулушини «дөләт мәхпийәтлики» дәп қариливатиду десәк боламду?

Җаваб: қандақ қараш вә қандақ йезиш силәрниң ишиңлар.

Соал: абдукерим рахманниң тутулушиму «дөләт мәхпийәтлики» му?

Җаваб: уму шундақ.

Соал: абдукерим рахман немә сәвәбтин тутулди?

Җаваб: арсланниңки билән охшаш.

Соал: раһилә давутниңчу?

Җаваб: арсланниңму, абдукеримниңму вә раһиләниңму немә үчүн тутулғанлиқини билмәймән.

Һазирға қәдәр шинҗаң университетиниң сабиқ мудири ташполат тейипниңла тутқун қилинғанлиқи дәлилләнгән иди. юқириқи учурлардин гәрчә делониң тәпсилати мәлум болмиған болмисиму, әмма профессор абдукерим рахман, арслан абдулла вә раһилә давутларниң иштин тохтитилғанлиқи вә нөвәттә лагер яки қамақханида тутуп турулуватқанлиқи дәлилләнди.

Пикирләр (0)
Share
Толуқ бәт