Назир дәриҗилик икки әмәлдар-ширзат бавудун билән әнвәр абдушүкүр партийидин қоғлап чиқирилған

Мухбиримиз шөһрәт һошур
2019.01.22
Shirzat-Bawdun-we-Enwer-Abdushukur.jpg Партийидин қоғлап чиқирилған назир дәриҗилик икки әмәлдар - ширзат бавудун (оңда) билән әнвәр абдушүкүр (солда). 2019-Йили январ.
Social Media


21‏-январ күни хитай ахбарати уйғур райондики назир дәриҗилик әмәлдарлардин ширзат бавудун билән әнвәр абдушүкүрниң партийидин қоғлап чиқирилғанлиқини хәвәр қилди. Илгири мухбиримиз ширзат бавудунниң тутқун қилинғанлиқини хәвәр қилған вә хәвәрни игиләш давамида алақидар хадимларниң ширзат бавудунниң тутқун қилинғанлиқи һәққидә зиддийәтлик җаваб берип һәқиқий әһвални йошурған иди. Сиясий көзәткүчи таһир һамут, шинхуаниң бу қетимқи хәвирини юқириқи икки әмәлдарниң тутқунда икәнликиниң дәлили дәп қарашқа болидиғанлиқини баян қилди.

Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Һөрмәтлик радио аңлиғучилар, шинхуа агентлиқи қатарлиқ хитай ахбарат васитилириниң хәвәр қилишичә уйғур аптоном районлуқ партком 9 ‏-нөвәтлик интизам тәкшүрүш комитетиниң 4 ‏-нөвәтлик омумий йиғини мушу айниң 19 ‏-вә 20 ‏-күнлири үрүмчидә ечилған. Йиғинда бир түркүм мәсилиләр қатарида аптоном районлуқ партком сиясий қанун комитетиниң муавин секретари ширзат бавудун билән или областлиқ парткомниң муавин секретари әнвәр абдушүкүр үстидин тәйярланған тәкшүрүш доклатиға қарап чиқилған вә даимий комитетниң мәзкур икки әмәлдарни интизамға еғир дәриҗидә хилаплиқ қилғанлиқи үчүн бәргән партийидин қоғлап чиқириш қарари тәстиқланған. Хәвәрдә ширзат бавудун билән әнвәр абдушүкүрниң конкрет қандақ хаталиқ өткүзгәнлики баян қилинмиған; әмма бу иккиси үстидики тәкшүрүш доклатини интизам тәкшүрүш комитетиниң 40 нәпәр һәйәт әзасидин башқа, сирттин 206 кишиниң көздин кәчүргәнлики әскәртилгән.

Буниңдин бир ай аввал америка уйғур бирләшмисиниң рәиси илшат һәсән райондики алақә торлиридин сабиқ муавин секретар ширзат бавудунниң икки йүзлимичилик билән әйиблинип, 2018-йили 17 ‏-декабир күни тутқун қилинғанлиқи һәққидә учур тапшурувалған. Әйни чағда биз бу һәқтә ениқлаш елип барғинимизда, алақидар хадимлар, ширзат бавудунниң нәдилики һәққидә зиддийәтлик җавабларни бәргән. Хадимлардин бири ширзат бавудунниң хелидин бери хизмәт орнида йоқ икәнликини ашкарилиса, йәнә бир мәсул хадим униң сиясий кеңәшкә йөткилип кәткәнликини ейтқан. Әмма хитайниң тор архиплиридин “бәйду” дики бир хәвәрдә ширзат бавудунниң 2018-йили сентәбирниң дәсләпки һәптиси аптоном районлуқ сиясий кеңәштики муавин баш катиплиқ вәзиписидин қалдурулғанлиқи тилға елинған. Нәтиҗидә алақидар хадимларниң ширзат бавудунниң тутқунда икәнликини йошуруватқанлиқи мәлум болған.

Илгири хитайниң мәркизи партийә мәктипидә оқутқучилиқ қилған, нөвәттә америкада яшаватқан сиясий көзәткүчи таһир һамут әпәнди, хитайниң алақидар җаза қаидә-тәртиплиригә асасән, ширзат бавудун билән әнвәр абдушүкүрниң партийидин қоғлап чиқирилишини уларниң хелидин бери тутқунда икәнликиниң дәлили дәп қарашқа болидиғанлиқини оттуриға қойди. Униң баян қилишичә, адәттә хитайда компартийә әзалири хаталашса, униңға аввал партийә ичидә агаһландуруш берилиду; партийидин қоғлиниш мәзкур әзаниң еғир бир хаталиқ өткүзгәнлики вә қаттиқ бир тәкшүрүшни баштин кәчүргәнликиниң нәтиҗиси.

Әнвәр абдушүкүр һәққидә мәлумати йоқлуқини баян қилған таһир һамут әпәнди, әмма ширзат бавудун һәққидә билидиғанлирини төвәндикичә баян қилди.

Шинхуа агентлиқиниң21-январдики хәвиридә баян қилинишичә, мәзкур икки әмәлдарниң партийидин қоғлап чиқирилғанлиқи елан қилинған мәзкур йиғинға уйғур районниң һөкүмдарлиридин чен чуәнго, ли пеңшин қатарлиқлардин башқа, шөһрәт закир, шавкәт имин, нурлан абдумиҗит, әркин тунияз қатарлиқ әмәлдарларму толуқ иштирак қилған. Өткән айдики программимизда ширзат бавудунниң тутқун қилиниши һәққидә пикир баян қилған илшат һәсән әпәнди, хитайниң бу түрдики җазалар арқилиқ уйғур рәһбирий кадирларни чөчүтмәкчи вә өзигә техиму беқиндурмақчи болуватқанлиқини илгири сүргән вә ақивәттин тоғра дәрс елиниши керәкликини оттуриға қойған иди.

Һөрмәтлик радио аңлиғучилар, юқирида уйғур районида назир дәриҗилик икки әмәлдарниң партийидин қоғлап чиқирилғанлиқи һәққидә аңлитиш бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.