Долқун әйса вакаләтсиз милләтләр тәшкилатиға муавин рәис болуп сайланди

Ихтиярий мухбиримиз әкрәм
2017.06.28
wakaletsiz-milletler-teshkilati-dolqun-eysa.jpg Вакаләтсиз милләтләр тәшкилати(UNPO) ниң 13-нөвәтлик қурултийида д у қ баш катипи долқун әйса әпәнди мәзкур тәшкилатниң муавин рәисликкә сайлиди. 2017-Йили 28-июн, шотландийә.
RFA/Ekrem

Вакаләтсиз милләтләр тәшкилати(UNPO) ниң 13-нөвәтлик қурултийи 28-июн күни сайлам өткүзүп, долқун әйсани муавин рәисликкә сайлиди.

Шотландийә парламентида 26-июн башланған вакаләтсиз милләтләр тәшкилатиниң 13-нөвәтлик қурултийи 28-июн күни сайлам өткүзүп, тәшкилатниң рәһбәрлик қатлимида бир қатар өзгәртишләрни елип барди. 2003-Йилидин буян мәзкур тәшкилатниң иҗраийә комитети әзаси болуп кәлгән д у қ баш катипи долқун әйса әпәнди, бүгүнки сайламда муавин рәисликкә сайлинип, UNPO арқилиқ уйғур дәвасини йәниму илгири сүрүш үчүн пухта асас салған болди.

Шотландийәдики UNPO ниң йиғин залидин зияритимизни қобул қилған әркин алиптекин әпәнди, долқунниң муавин рәис болуп сайланғанлиқидин көп мәмнун болғанлиқини тилға алди. Әркин алиптекин әпәнди сөзидә, бир уйғур сиясий паалийәтчисиниң UNPO да болушиниң уйғур дәвасиға көп һәссиләр қатидиғанлиқини тәкитлиди.

Долқун әйса әпәндиму бу һәқтә зияритимизни қобул қилип, алди билән 28-июн елип берилған паалийәтләрдин қисқичә мәлумат берип өтти. Долқун әйса әпәнди сайлам һәққидиму тохтилип, UNPO ниң баш катипи марино басдухен әпәндиниң йәнә баш катип болуп сайланғанлиқини, өзиниң UNPO хадимлириниң бирдәк авазиға наил болуп, муавин рәисликкә сайланғанлиқини вә буниңдин хурсән болғанлиқини изһар қилди.

UNPO Баш катипи марино әпәндиму бу һәқтә зияритимизни қобул қилип, долқун әйсаниң уйғурларға вакалитән муавин рәиси болуп сайланғанлиқиниң уйғур давасиға техиму пайдилиқ болидиғанлиқини илгири сүрди. У мундақ деди: “хитайниң қаттиқ бесим сияситигә дучар болуватқан уйғурлар мәсилиси, вакаләтсиз милләтләр тәшкилатиниң күнтәртипидики әң муһим бир мәсилә. Бир нәпәр уйғур вәкилиниң бу тәшкилатқа муавин рәис болуп сайлиниши, бундин кейин уйғурлар мәсилисиниң дуня җамаитигә тонулушиға зор һәссә қатиду. Вакаләтсиз милләтләр тәшкилати хитай бесимиға дуч келиватқан уйғурлар, тибәтликләр, җәнубий моңғулийәликләр вә хитай демократлириниң мәсилисини б д т вә явропа парламентида аңлитиш үчүн 20 нәччә йилдин буян хизмәтләр қилип кәлди. Долқун әйса билән бундин кейин һәмкарлишип қилидиған ишлиримизниң салмиқи техиму артип бариду. Буниң уйғурларға зор пайдиси болиду, дәп ойлаймән.”

Үч күн давамлашқан вакаләтсиз милләтләр тәшкилатиниң 13-қурултийи бүгүн ахирлашқан. Өткән йилниң башлирида баш штабини голландийәниң денхаг шәһиридин явропа парламенти җайлашқан белгийә пайтәхти бирюсселға йөткәп кәлгәндин кейин, UNPO ниң хизмәтлири техиму алдираш болуп кәткән. Вакаләтсиз милләтләр тәшкилати хадими лусия парручи ханим бу йил январдин буян мәхсус д у қ билән явропа парламенти оттурисида васитичилик хизмитини үстигә алған болуп, у йил бешидин һазирға қәдәр қурултай баш катипи долқун әйса әпәндиниң явропа парламентиниң муһим милләт вәкиллири билән учришишиға шараит һазирлап бәргән.

Вакаләтсиз милләтләр тәшкилати әң дәсләптә мәшһур уйғур сиясий паалийәтчи әркин алиптекин қатарлиқ 4 кишиниң тәшәббуси билән оттуриға чиққан вә 1990-йили февралда рәсмий қурулған. Нөвәттә әза дөләт вә милләт сани 45 кә йәткән мәзкур тәшкилат уйғур авазини дуняға аңлитишқиму зор төһпиләрни қошуп кәлмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.