Бир нәпәр “милләтләр иттипқлиқи үлгиси” ниң корладики тәрбийәләш мәркизидә көргән-аңлиғанлири (3)

“хәнзудин бала беқивелипму, аиләмниң бихәтәрликини қоғдиялмидим”

Мәлум болишичә, корладики 4 нәпәр мәшһур “милләтләр иттипақлиқи үлгиси” дин бири болған наман бавудун икки йилниң алдида икки яшлиқ бир хитай йетим балини беқивалған. Униң хитайларға садақәт ипадиләп басқан бу чоң қәдимиму униң аилә тавабиатлириниң бихәтәрликини капаләт астиға алалмиған. Униң “тәшвиқат нәмуничиси” болған аяли бу йил 10‏-айниң бешидин башлап қамаққа елинған; ичкиридә оқуш пүттүрүп сақчиханиға орунлашқан қизи аписиниң аталмиш “җинайити” сәвәплик сақчилиқ хизмитидин елип ташланған.

Корладики “милләтләр иттипақлиқи үлгиси” наман бавудуннниң баян қилишичә, у хизмәт вә садақити сәвәплик әтиварлиниватқан вә тәқдирлиниватқан йиллири, йәни икки йилниң алдида “көзигә иссиқ көрүнгән” икки яшлиқ бир хитай балини беқивалған. У беқивалған хитай бала нөвәттә 4 яшта. Униң “милләтләр иттипақлиқи” хизмитидә көрсәткән бу садақити, басқан бу қәдими, бу йилқи сиясий долқунда униң аилә-тавабиатиниң бихәтәрликини қоғдашта карға кәлмигән. У секритар мәзгилидә қурған геләм карханиси әйни чағда йезилиқ һөкүмәтниң қоллишиға еришкән болсиму, әмма карханида ишләвтқанлар арсида аталмиш “қанунсиз диний матирияллар” ни көргәнләр байқалғачқа, карханини башқуриватқан аяли патигүл давутму қамаққа елинған.

Мәлум болушичә, наман бавудун аилиси әслидә 3 нопуслуқ болуп, һәр үчилиси партийә әзаси икән. Әр-кәнт секретари вә милләтләр иттипақлиқи үлгиси, аял-тәшвиқат нәмуничиси вә ярдәмчи аяллар мудири; қиз-хитай өлкилиридә толуқ оттурини пүттүргән, йезилиқ сақчи хадими икән.

“тәшвиқат нәмуничиси” болған патигүл давут бу йил 10-айниң 9-күни тутулған вә аталмиш “тәрбийәләш мәркизи” гә әкетилгән. Нөвәттә у бир мәһәл өзи тәрбийәлигән, “әсәбийлик” тин узақ туруш һәққидә агаһландурған кәнтики аһалиләр билән бирликтә, “тәрбийә” ләнмәктикән. Тутулғиниға 3 айчә болған болсиму әмма униң қайсий “тәрбийиләш мәркизи” дә тәрбийәлиниватқанлиқи, еливатқан“тәрбийә” синиң қайсий мәзмун яки шәкилдә икәнлики вә саламәтлик әһвали һәққидә һечқандақ учур мәлум әмәс. Қизи аниси тутулуп бир һәптидин кейин сақчилиқ хизмитидин тохтитилған. Аилисидики сақчи күйоғулму бу ақивәтниң алдини алалмиған.

Мәлум болушичә, наман бавудун икки һәптиниң алдида сақчиханиға сораққа елип келингән. У, өзи беқивалған 4 яшлиқ хитай балини сақчиханиға өзи билән биллә елип кәлгән болсиму, униң сорақтин қутулушиға сәвәб болалмиған. У сақчиханида тутуп турулуватқанда беқивалған хитай балини үстәлгә ятқузуп, таң атқучә дүмбисини силап чиққан болсиму, әмма бу пәпиләшләр сақчиларни тәсирләндүрәлмигән.