Хотәндә җүмә күни йүз бәргән вәқәдә аз дегәндә бир киши өлгәнлики ашкариланмақта

Мухбиримиз шөһрәт һошур
2014-10-02
Share
xoten-maniwer-xitay-saqchi.jpg Хитай қораллиқ күчлири террорлуққа қарши туруш маневири өткүзди. 2014-Йили 6-июн, хотән.
AFP

Иҗтимаий таратқулар өткән җүмә күни йәни 26-сентәбир күни хотән шәһиридә партлаш вәқәси йүз бәргәнлики, вәқәдин кейин хитайниң хотән шәһиригә йәнә көпләп әскәр йөткигәнлики һәққидә хәвәр бәргән иди. Мухбиримиз бу һәқтә шәнбә күни әһвал игилигән чеғида шәһәрдики бир сақчихана хадими, шу күни мәлум бир вәқә билән бир кишиниң дохтурханида җан үзгәнликини ашкарилиған болсиму, әмма немә вәқәликидин хәвәрсизликини ейтқан иди.

Мухбиримизниң бүгүнки игиләшлири давамида, өткән җүмә күни хотән шәһәр яқисидики тосилла дегән йезида вәқә йүз бәргәнлики, вәқәниң җүмә намизидин қайтқан 10 мотсиклитлиқ кишиниң хотән шәһиригә қарап йүрүш қилиши сәвәблик келип чиққанлиқи ашкариланди.

Өткән җүмә күни хотән шәһиридә партлаш йүз бәргәнлики һәққидә иҗтимаий таратқуларда хәвәр тарқалғандин кейин, биз хотән шәһәр ичидики бир сақчиханиға телефон қилдуқ. Сақчи хадими бир күн аввал йүз бәргән вәқәдин хәвәрсизликини, әмма, нурбағ сақчиханиси әтрапидики бир дохтурханиға бир яридарниң апирилғанлиқи вә бешидин зәхимләнгән бу яридарниң дохтурханида җан үзгәнликини паш қилди. Бүгүн биз явағ сақчиханисиға телефон қилғинимизда, сақчи хадими бүгүн өзи қатнашқан йиғинда аңлиған бир қисим вәқәләр һәққидә мәлумат бәрди. Униң йиғинда аңлиғанлириға асасән баян қилишичә, өткән җүмә күни хотән шәһәр яқисидики тосилла мәсчитидин қайтқан 10 мотсиклитлиқ киши, хотән шәһәр ичигә қарап йүрүш қилған, уларниң һуҗум пилани барлиқини байқиған сақчилар алдини тосуп бир тәрәп қилған. Әмма йиғинда уларниң бир тәрәп қилиниш җәряни һәққидә тәпсилий мәлумат берилмигән. Бу сақчи хадими йәнә хотәндә әң йеқинда йүз бәргән вәқәләр қатарида хотән шәһәр ичидә бир хитай көчмәнниң бир уйғур тәрипидин пичақлиқ һуҗумға учриғанлиқиниму баян қилди.

Юқириқи мәлуматлардин тусулла йезисидин хотән шәһиригә қарап йолға чиққан 10 мотсиклитлиқниң бир тәрәп қилиниш вәқәси билән хотән нурбағ тәвәликидә бир яридарниң дохтурханида өлгәнлик вәқәсиниң охшаш бир вәқә яки әмәслики ениқ әмәс. Әгәр бир вәқә болған тәқдирдә, җүмә күни хотәндә йүз бәргән вәқәдә аз дегәндә бир киши өлгәнлики ашкариланмақта.

Тәпсилатини аваз улинишидин аңлиғайсиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт