Сирлиқ 22-апрел вәқәсиниң гума көктерәктә йүз бәргәнлик еһтималлиқи ашкариланмақта

Хитай ахбарати мушу айниң 8-күни хотәндә қечип йүрүватқан гумандарлардин 3 нәпирини қаршилиқ көрсәткәнлики үчүн етивәткәнликини хәвәр қилди.

Хәвәрдә мәзкур гумандарларниң 2015-йили гума наһийисидә йүз бәргән 22-апрел вәқәсигә четишлиқ икәнлики илгири сүрүлгән; әмма бу вәқәниң немә вәқә икәнлики һәққидә һечқандақ изаһат берилмигән. Йүз берип икки йилдин кейин тунҗи қетим тилға елинған бу сирлиқ вәқә хәлқара ахбарат васитилириниңму диққитини тартти.

Мухбиримиз бүгүн бу вәқә һәққидә ениқлаш елип барди. Нәтиҗидә 1-айниң 8-күни гума наһийисиниң көктерәк базар төвән қумкөл кәнтидә, бурун тутуш буйруқи чиқирилған бир гумандарниң етиветилгәнлики ашкариланди.

Юқириқи учурда тилға елинған, төвәнқумкөл кәнтидә етиветилгән гумандарниң хитай ахбарати хәвәр қилған етиветилгән 3 гумандардин бири икәнлики һазирчә ениқ әмәс, әмма төвән қумкөл кәнтиниң гума тәвәликидә болуши вә етиветилгән гумандар үстидин бурун тутуш буйруқи чиқирилғанлиқи, хәвәрдә дейилгән 22-апрел вәқәсиниң гума көктерәктә йүз бәргәнлики вә яки вәқә гумандарлириниң көктерәклик икәнлики еһтималлиқини ашкарилимақта.

Буниң үстигә “шинҗаң гезити” ниң 28-декабирдики бир хәвиридә, гума сот мәһкимисиниң гума көктерәк базириниң партком секретари яң җеңфең, муавин секретари әркин мәхмут вә төвән қумкөл кәнт секретари розимәмәт мәхмутни “хизмәттә бипәрвалиқ қилиш” қатарлиқ җинайәтләр билән әйибләп, 20 йиллиқтин кәскәнлики баян қилинған. Бу хәвәрдә йәнә, розимәмәт маһмутниң бипәрвалиқ қилиштин башқа (җинайәтчини) қанат астиға елиш җинайити барлиқиму әскәртилгән иди.