16-Нөвәтлик уйғур яшлирини тәрбийәләш курси истанбулда ахирлашти

Ихтиярий мухбиримиз әркин тарим
2018.07.16
Share on WhatsApp
Share on WhatsApp
yashlarni-terbiyelesh-kursi-2018-turkiye.jpg 16-Нөвәтлик уйғур яшлирини тәрбийәләш курсидин көрүнүш. 2018-Йили 15-июл, истанбул.
RFA/Erkin Tarim

16-Нөвәтлик уйғур яшлирини демократийә вә кишилик һоқуқ билимлири билән тәрбийәләш курси истанбулда ахирлашти.

13-Июлдин 15-июлғичә истанбул рамада меһманханисида өткүзүлгән курста германийә, белгийә вә түркийәдин тәклип қилинған мутәхәссисләр “шәрқий түркистан тарихи”, “шәрқий түркистанниң һазирқи әһвалиға нәзәр”, “шималий америкидики уйғур давасидин мәлумат”, “хәлқаралиқ уйғур инсан һәқлирини қоғдаш тиришчанлиқимизға омумий нәзәр” дегәндәк темиларда доклат бәргәндин кейин, курсқа иштирак қилған оқуғучилар билән мәзкур темилар тоғрисида музакирә елип берилди. Курсниң ахирқи күни гуруппилар бойичә музакирә өткүзүлүп, музакирә нәтиҗилири оттуриға қоюп өтүлди.

Курсниң ахирида йиғин тоғрисида тәпсилий көз қаришини игиләш үчүн д у қ яшларни демократийә вә кишилик һоқуқи билимлири билән тәрбийәләш курсиға риясәтчилик қилған петер ирвән әпәнди, д у қ яшлар комитети мудири ғәйюр қурбан, д у қ иҗраийә һәйити рәиси өмәр қанат әпәнди, курсқа түркийәниң һәрқайси университетлиридин келип иштирак қилған уйғур оқуғучилар билән сөһбәт елип бардуқ.

Петер ирвен әпәнди истанбулда өткүзүлгән курсниң мувәппәқийәтлик өткүзүлгәнликини баян қилип мундақ деди: “мән 16-нөвәтлик уйғур яшлирини демократийә вә кишилик һоқуқ билимлири билән тәрбийәләш курсиға мәсул болуп кәлдим. Курсимиз бурунқидикиләргә охшашла мувәппәқийәтлик өтти дәп қараймән. Курс җәрянида түркийәдики уйғур яш актиплар билән тонуштум. Улар билән уйғур дәвасини түркийәдики әмәлий әһвални асас қилип туруп қандақ оттуриға қоюш тоғрисида музакирә елип бардуқ. Д у қ ниң хәлқарадики паалийәтлири тоғрисида мәлумат бәрдуқ. Мувәппәқийәтлик бир паалийәт болди”.

Үч күнлүк курс ахирлашқандин кейин микрофонимизни д у қ иҗраийә һәйити рәиси өмәр қанат әпәндигә узаттуқ. У, курсни хуласиләп, бу қетимқи курсниң алаһидиликиниң қатнашқан яшларниң актипчанлиқиниң юқири болуши, саниниң көплүки икәнликини баян қилди.

Д у қ яшлар комитети мудири ғәйюр қурбан әпәнди курсқа иштирак қилған уйғур яшлириниң даваға болған қизиқишидин наһайити тәсирләнгәнликини баян қилди.

Ғәйюр қурбан үч күнлүк курс җәрянида яшлар билән сөһбәт елип бериш җәрянида д у қ ни уйғур яшлириға яхши тонуштуралмиғанлиқини чүшинип йәткәнликини баян қилди.

Курсқа қатнашқан уйғур паалийәтчи һәсән абдурахман әпәнди курс җәрянида уйғур дәвасини қилишниң уссулини өгәнгәнликини баян қилди.

Уйғур яшлирини демократийә вә инсан һәқ вә һоқуқлири билимлири билән тәрбийәләш курсиға америка қошқа штатлири, германийә, вә түркийәдики д у қ ниң бәзи рәһбәрлири вә хадимлиридин сирт, түркийәниң һәрқайси университетлирида оқуватқан 40 уйғур оқуғучи қатнашти. Уйғур яшлирини демократийә вә кишилик һоқуқлири билән тәрбийәләш курси тунҗи қетим түркийәдә өткүзүлгән болуп, бурун америка, германийә, шиветсийә, шветсарийә, белгийә, норвегийә қатарлиқ дөләтләрдә ечилған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.