Yekende jiddiy halet yürgüzülgen

Yekende yüz bergen bir qatar qanliq toqunushlardin kéyin nahiye teweside herbiy halet yürgüzülgenliki, üch kündin buyan yekendin qoshna nahiyelerge qatnaydighan qatnashning toxtitilghanliqi hemde xitay herbiy qisimlirining yeken'ge yötkep kélinip mektep we bashqa muhim orunlargha orunlashqanliqi melum.

Igiligen uchurlardin melum bolushiche, yekenning élishqu baziri teweside roza héyt mezgilide yüz bergen bir qatar qanliq toqunushlar pütün qeshqer wilayitining weziyitini jiddiyleshtürüwetken.

Yeken'ge qoshna nahiyelerdimu jiddiychilik körülgen. 3 Kündin buyan intérnét tori qamal qilinip, ündidar qatarliq ijtima'iy taratqularni ishlitish mumkin bolmighan. Yeken nahiyelik partkom we qeshqer wilayetlik partkom buyruq chüshürüp herqandaq shexs we orunning mezkur weqe heqqide taratqulargha melumat bérishi yaki bu heqte gep qilishini chekligen.

Yeken nahiyesidiki idare-jem'iyetler we puqralarning téléfonliri üzüwétilgen yaki kontrol astigha élin'ghan. Buning bilen pütün yeken xelqi éghir siyasiy bésim we wehime ichide éghizi sözlimeydighan, közi körmeydighan, quliqi anglimaydighan haletke ötiwélishqa mejbur bolghan.

Yeken nahiyelik téz yollanma shirkitide ishleydighan bir Uyghur xadim téléfonimizni qobul qilghan bolsimu, lékin etrapta höküm sürüwatqan wehimilik keypiyat tüpeyli ochuq-ashkara gep qilishqa pétinalmidi. Emma gep ariliqida u yeken nahiyesining herqaysi yéza-bazar we yollirining qamal qilin'ghanliqini, tinchsiz weziyetning téxiche dawamlishiwatqanliqini we intérnét torning üzülgenlikini bildürdi.

Weqe yüz bergen élishqu bazirining melum kent sékrétari turghun hidayet bügün ikkinchi qétim téléfonimizni alghan bolsimu, lékin weqe heqqide éghiz échishni qet'iy ret qildi. U sirttin téléfon bergen herqandaq muxbir eger özining isim-familisi, kimlik nomuri, muxbirliq kinishka nomuri we téléfon nomurini ochuq körsetmise, so'allargha jawab bermeydighanliqini bildürdi.

Yekenning xandi bazarliq ottura mektepke téléfon qilghinimizda, téléfonni mektep xadimliri emes, belki xitay herbiy qisimlirining nöwetchi xadimi aldi. U herbiy qisimning yéqinda mektepke yötkilip orunlashqanliqini, yekendiki toqunushning téxi tamamen tinchitilip bolunmighanliqini ashkara qildi. Halbuki, u bizning bu heqte ichkirilep sorighan so'allirimizgha dawamliq jawab bérishni ret qildi.

Yeken'ge qoshna poskam nahiyelik téz yollanma shirkitining bir xitay xadimi téléfonimizni qobul qilip, 3 kündin buyan yeken bilen bashqa nahiyeler arisidiki téz yollanma mulazimitining qatnash üzülgenliki seweblik toxtap qalghanliqini bildürdi.

Tepsilatini awaz ulinishtin anglighaysiz.