Сүкүттики сада: иҗтимаий таратқуларда «#уйғурларға қулақ селиңлар» намлиқ паалийәт қанат яймақта

Ихтиярий мухбиримиз җәвлан
2020-04-28
Елхәт
Пикир
Share
Принт
«#Hear Uyghurs» (Уйғурларға қулақ селиңлар) намлиқ хәштәг паалийитини башлиған уйғур паалийәтчи арслан һидайәт әпәнди.
«#Hear Uyghurs» (Уйғурларға қулақ селиңлар) намлиқ хәштәг паалийитини башлиған уйғур паалийәтчи арслан һидайәт әпәнди.
Social Media

Йеқинқи күнләрдә тивиттер қатарлиқ аммиви таратқуларда чәтәлдә яшаватқан уйғурларниң авазсиз видейо ишләп, хәлқара җамаәтни уйғурларни қутқузушқа үндәватқанлиқи яки лагерларға қамақлиқ ата-аниси вә уруқ-туғқанлири һәққидә гуваһлиқ бериватқанлиқи мәлум болмақта. Бу видейоларниң көпинчиси тивиттерда «#һәар уйғурс» (уйғурларға қулақ селиңлар) намлиқ хәштәг астида тарқитилған.

Һазир бәһрәйндә турушлуқ уйғур паалийәтчи арслан һидайәт бу тәшвиқатниң башламчиси болуп, бу йил 20-апрел өзиниң тивиттер һесабида 31 секунтлуқ бир видейо елан қилған. У бу видейода хәлқарани уйғурларға көңүл бөлүшкә, һәрикәтлик ишарәтләр билән уйғурларниң нидасиға қулақ селишқа чақирған. Бу видейо 32 миң қетим көрүлгән болуп, 340 қетим һәмбәһирләнгән.

У видейониң астиға изаһат берип: «дәйдиған нурғун гәплирим бар, әмма бу йәрдә авазим йоқ. Дуняға авазимни аңлитип уйғурларни қутқузувелиңлар дедим, лекин улар аңлимайватқандәк қилиду. Бу видейода бирәр мәсилә йоқ, әмма дуняда мәсилә бар,» дегән.

У зияритимизни қобул қилип, бу паалийәтни башлаштики сәвәбләрни чүшәндүрди. У уйғурлар нәччә йилдин бери шунчә гуваһлиқларни берип, шунчә намайишларни қилип келиватқан болсиму, әмма хәлқараниң буниңға йетәрлик көңүл бөлмигәнликини, болупму б д т кишилик һоқуқ кеңишиниң бу мәсилигә сәл қариғанлиқини, йәнә келип бу кеңәшкә йеқинда бир хитай әмәлдарни вәзипигә қойғанлиқини, шуңа униңға бу усулда наразилиқ билдүрүшни ойлиғанлиқини билдүрди.

У йәнә корона вируси тарқалғандин кейин уйғур мәсилисиниң унтулуп қеливатқанлиқини, дәва ишлирини бу хил йеңичә усулда елип барғанда үнүми яхши болидиғанлиқи вә техиму көп кишиләрни бу паалийәткә елип киргили болидиғанлиқини ейтти.

Америкада турушлуқ паалийәтчи, уйғур һәрикити тәшкилатниң рәиси рошән аббас ханимму бу паалийәтни қоллиған. У 19-апрел өзиниң тивиттер һесабида һәдиси гүлшән аббас һәққидә авазсиз видейо гуваһлиқи бәргән болуп, униңға: «мән дуняға дәрдимни аңлитип кәлдим. Мени һазир аңлаватамсиләр?» дәп изаһат бәргән.

Зияритимизни қобул қилған рошән аббас ханим хәлқараға йиллардин бери сөзләп аңлиталмиған дәрд-әләмләрни бу қетим авазсиз көрситип беқиш үчүн бу паалийәткә қетилғанлиқини билдүрди.

Түркийәдә оқуватқан турсунҗан абләт авазсиз гуваһлиқ бәргүчиләрдин бири болуп, у бу һәқтики зияритимизни қобул қилип, сиңлиси айгүл абләт лагерға соланғандин кейин таратқуларда изчил түрдә уни қутулдуруш үчүн тиришиватқанлиқини билдүрди.

Тивиттердики «уйғурларға қулақ селиңлар» намлиқ хәштәгдә көрүлүшичә, бу хәштәг астида елан қилинған авазсиз гуваһлиқ видейоси 20 гә йеқинлишип қалған. Гуваһлиқ бәргүчиләр лагерға соланған қериндашлириниң сүритини көрситип, има-ишарәт вә қайғулуқ чирай ипадиси билән дуняға мураҗиәт қилған. Уларниң бу видейоға изаһат берип тәкитлимәкчи болғини «дуня бизгә қулақ салмайватиду!» дегәндин ибарәт болған.

Рошән аббас ханимниң қаришичә, дуня әгәр уйғурларниң авазиға балдуррақ қулақ салған болса, хитай вабасиға, хитайниң апәтлиригә сәл қаримиған, һеч болмиса идийә җәһәттә тәйярлиқ қилалиған болатти. Шундақ болсиму, уйғурлар хитайни давамлиқ паш қилиши, вәтән вә милләт дәвасини һәр хил йоллар арқилиқ күчәйтиши керәк икән.

Пакитлардин мәлумки, хитай 2017-йил 4-айдин башлап та һазирғичә 3 милйондин артуқ уйғур вә башқа мусулман милләтләрни лагерларға қамиған болуп, буларниң ичидә чәтәлдә яшаватқан уйғурларниң ата-анилири вә уруқ-туғқанлири бар. Муһаҗирәттики уйғурлар үч йилдин бери уруқ-туғқанлири һәққидә гуваһлиқ берип кәлгән. Бу қетим авазсиз гуваһлиқ бәргүчиләр әнә шуларниң бир қисми болуп, уларниң билдүрүшичә, бу қетимқи авазсиз гуваһлиқ бериш дәва ишлиридики йеңи синақ һәмдә уйғурларни қутқузуш һәрикитиниң бир қисми икән.

Пикирләр (0)
Share
Толуқ бәт