Kuchaliq doxtur tahir hesen chet'eldiki “Xeterlik kishiler” bilen téléfonlashqanliqi üchün tutulghan

Muxbirimiz shöhret hoshur
2019.09.27
lager-derwazisi.jpg Uyghur rayonidiki xitayning 13-déwiziyesi “Terbiyelesh lagéri” ning aldi derwazisi. 2017-Yili aldinqi yérim yili, qumul.
BITTER WINTER

Pa'aliyetchi abduweli ayup teripidin tüzülgen “Tutqundiki ziyaliylar tizimliki” de kucha nahiyelik doxturxanining doxturi tahir hesenningmu tutqunda ikenliki yézilghan. Muxbirimizning bu heqte élip barghan éniqlashliri dawamida mezkur uchurning toghriliqi delillendi we uning chet'eldiki atalmish “Xeterlik kishiler” bilen téléfonlashqanliqi üchün tutulghanliqi aydinglashti.

Hörmetlik radi'o anglighuchilar, mezkur “Tutqundiki ziyaliylar tizimliki” de kucha nahiyelik doxturxanining doxturi tahir hesenning lagérda ikenliki yézilghan. Emma uning qachan we néme üchün tutulghanliqi bayan qilinmighan. Téléfonimizni qobul qilghan kucha nahiyelik doxturxana xadimliri tahir hesenning doxturxanida bar-yoqluqi heqqidiki so'alimizgha jawab bermidi. Téléfonimizni qobul qilghan yene bir xadim doxtur tahir hesenning qachan tutulghanliqi heqqidiki so'alimizgha özining aldirashliqini seweb qilip körsitip, jawab bermidi. Emma xizmetdishi tahir hesenning tutqunda ikenlikini ret qilmidi.

Muhajirettiki kucha weziyitidin xewerdar kishilerdin biri tahir hesenning tutqunda ikenlikidin xewerdar ikenlikini bayan qilish bilen birlikte uning tutulush sewebi heqqidiki perizini otturigha qoydi. U bu heqte tahir hesenning ijtima'iy pa'aliyetlerde aktip biri ikenliki, kuchada jem'iyette xéli tonulghanliqi, bolupmu diniy sahediki kishiler bilen alahide yéqin munasiwiti barliqi, belkim uning munasiwet da'irisidin chataq chiqqanliqi üchün tutulup ketkenlik éhtimalliqini ilgiri sürdi.

Kucha nahiyelik doxturxanidin téléfonimizni qobul qilghan doxturxana qoghdash xadimi tahir hesenning téléfondin chataq chiqqanliqi üchün, yeni atalmish “Xeterlik kishiler” bilen téléfonlashqanliqi üchün tutulghanliqini ashkarilidi. Emma bu xadim tahir hesenning éniq qachan tutulghanliqi we nöwette qeyerde tutup turuluwatqanliqi heqqide melumati yoqluqini bayan qildi. U bu heqte kucha nahiyelik dölet amanliq saqchiliridin ehwal igilishimizni tewsiye qildi. “Tutqundiki ziyaliylar tizimliki” ning élan qilin'ghan waqtidin qarighanda, tahir hesenning bultur yil axiri yaki yil otturiliri tutulghanliqi melum. Kuchadiki melum bir dölet amanliq xadimi tahir hesenning tutulghinigha bir yil bolup qalghanliqini bayan qildi. U yene tahir hesenning chet'el bilen téléfonlashqini üchün tutulghanliqini delillidi. 

Hörmetlik radi'o anglighuchilar, muhajirettiki kuchaliqlardin biri tünügün doxtur tahir hesenning kuchadiki eng tejribilik ashqazan doxturi ikenliki, uning tutulushining doxturxana ichki késellikler bölümide chong bir boshluq yaratqanliqi, doxturxana mes'ullirining nahiye rehberlirige kapaletname yézip bérish arqiliq tahir hesenni lagérdin élip chiqqanliqini bayan qilghan bolsimu, emma bu uchurning toghriliqi delillenmidi.

Firansiye axbarat agéntliqining ötken yili xitayning ichki matériyalliridin neqil élip xewer qilishiche, Uyghur rayonining partkom sékrétari chén chü'en'go atalmish “Terbiyilesh merkezliri” ni “Bashqurush” ta “Mekteptek oqutush, herbiy gazarmidek ching tutush we türmidek mexpiy tutush” ni teshebbus qilghan iken. Shunga doxtur tahir hesenning doxturxanining arilishish bilen qoyup bérilgenliki uchurining toghriliqi éhtimaldin uzaq körülmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.