Ғулҗидики таксим сода сарийиниң директори әнвәр турсун үстидин сот ечилған

Мухбиримиз шөһрәт һошур
2019-10-08
Елхәт
Пикир
Share
Принт
Тутқун қилинған таксим сода сарийиниң директори әнвәр турсунғоҗа (солда) вә униң оғли әзимәт әнвәр (оңда).
Тутқун қилинған таксим сода сарийиниң директори әнвәр турсунғоҗа (солда) вә униң оғли әзимәт әнвәр (оңда).
Photo: RFA

Ғулҗа вәзийитидин хәвәрдар кишиләрдин бири 8-өктәбир радийомизға учур йоллап, ғулҗа шәһиридики таксим сода сарийиниң директори әнвәр турсун үстидин сот ечилғанлиқини мәлум қилди. Мухбиримизниң ғулҗа шәһәр тәвәсидики алақидар органларға қарита елип барған телефон зиярәтлири давамида мәзкур учурниң тоғрилиқи дәлилләнди. Мәлум болушичә, аилә әзалири қатнаштурулмиған вә адвокатсиз ечилған бу сотта һөкүм чиқириш 3 ай кейингә қалдурулған.

8-Өктәбир күни радийомизға кәлгән имзасиз бир мәктупта дейилишичә, ғулҗа шәһәрлик сот мәһкимиси 8-өктәбир күни чүштин бурун ғулҗидики таксим сода сарийиниң директори, тутқун әнвәр турсун үстидин сот ачқан. Әмма мәктупта, сотқа кимләрниң қатнашқанлиқи вә сотта қандақ һөкүм чиққанлиқи қәйт қилинмиған. Өткән айда радийомиз вә иҗтимаий таратқуларда әнвәр турсун һәққидә берилгән хәвәрләрдин мәлум болушичә, бу йил 50 яшқа киргән әнвәр турсун ғулҗа шәһириниң һәрәмбағ коча башқармиси йеңиһаят аһалиләр районида олтурушлуқ болуп, у оғли әзимәт әнвәрни түркийәдә оқутқанлиқи үчүн оғли билән бирликтә өткән йили тутқун қилинған. Телефонимизни қобул қилған йеңиһаят тәвәликидә олтурушлуқ бәзи хитай хадим вә аһалиләр әнвәр турсунниң кимлики вә нөвәттики әһвалидин хәвәрсизликини ейтти.

Радийомизға кәлгән инкаста, әнвәр турсунниң оғлини түркийәдә оқутқандин башқа түркийә истанбулдики таксим дегән йәр намини ғулҗа шәһиридики дукининиң нами қилип қолланғанлиқи үчүн пантүркизм майиллиқи гумани билән тутулған; ғулҗа шәһиридики таксим сода дукини җайлашқан базар тәвәликидики бир дукандарму әнвәр турсунниң әһвали һәққидики соалимизға җаваб берәлмиди. Әнвәр турсунниң канадада яшаватқан һәдиси мунәввәр, норвегийәдә яшаватқан сиңиллири мәрһаба вә патимәләрниң баян қилишичә, әнвәр турсун оғли әзимәт әнвәрни түркийәдә оқутқанлиқи үчүн хитайниң 9 йиллиқ мәҗбурий маарип түзүмини көзгә илмаслиқ әйиблимиси билән өткән йили 4 ‏-айниң 29 ‏-күни тутулған; оғул әзимәт әнвәр болса униңдин 3 ай бурун йәни 1‏-айниң 27 ‏-күни тутулған.

Ғулҗа шәһәрлик сақчи идарисиниң нөвәтчи хадими тутқун әнвәр турсун тәвә болған йеңиһаят сақчиханисиниң телефон номурини тәминлигән болсиму, әмма униң нөвәттики әһвали һәққидә мәлумат берәлмиди. Йеңиһаят сақчиханисиниң бир хадими, бүгүн, йәни 8-өктәбир күни чүштин бурун әнвәр турсун һәққидә сот ечилғанлиқини дәлиллиди. Униң баянлиридин мәлум болушичә, әнвәр турсун үстидин ечилған сотқа, әнвәр турсунниң аилә әзалириму, әнвәр турсун тәвә болған ачал аһалә комитети хадимлириму қатнаштурулмиған. Адвокатсиз ечилған бу сотта һөкүм 3 ай кейин чиқиришқа қалдурулған. Сотниң җәрянидин йеңиһаят сақчихана хадимлириму хәвәрсиз қилған. Бу хадим, әнвәр турсунниң түркийә билән сода қилғанлиқи үчүн, оғли әзимәт әнвәрниң болса, хитайниң 9 йиллиқ мәҗбурий маарип түзүмини көзгә илмиғанлиқи үчүн тутқунда икәнликини ейтти. Әнвәр турсун билән бирликтә кимләрниң сотланғанлиқидин хәвәрсизликини тилға алған бу хадим униң оғли әзимәт әнвәрниң техи сотланмиғанлиқини әскәртти.

Мәлум болушичә 8-өктәбир шәклән ечилған бу сотниң алдида тутқун әнвәр турсун ғулҗа шәһиридики боз түрмигә қамалғаникән; бу соттин кейин униң йәнә боз түрмигә қамалғанлиқи яки башқа җайға йөткәлгәнлики мәлум әмәс.

Пикирләр (0)
Share
Толуқ бәт