Ghuljidiki taksim soda sariyining diréktori enwer tursun üstidin sot échilghan

Muxbirimiz shöhret hoshur
2019-10-08
Élxet
Pikir
Share
Print
Tutqun qilin'ghan taksim soda sariyining diréktori enwer tursun'ghoja (solda) we uning oghli ezimet enwer (ongda).
Tutqun qilin'ghan taksim soda sariyining diréktori enwer tursun'ghoja (solda) we uning oghli ezimet enwer (ongda).
Photo: RFA

Ghulja weziyitidin xewerdar kishilerdin biri 8-öktebir radiyomizgha uchur yollap, ghulja shehiridiki taksim soda sariyining diréktori enwer tursun üstidin sot échilghanliqini melum qildi. Muxbirimizning ghulja sheher tewesidiki alaqidar organlargha qarita élip barghan téléfon ziyaretliri dawamida mezkur uchurning toghriliqi delillendi. Melum bolushiche, a'ile ezaliri qatnashturulmighan we adwokatsiz échilghan bu sotta höküm chiqirish 3 ay kéyin'ge qaldurulghan.

8-Öktebir küni radiyomizgha kelgen imzasiz bir mektupta déyilishiche, ghulja sheherlik sot mehkimisi 8-öktebir küni chüshtin burun ghuljidiki taksim soda sariyining diréktori, tutqun enwer tursun üstidin sot achqan. Emma mektupta, sotqa kimlerning qatnashqanliqi we sotta qandaq höküm chiqqanliqi qeyt qilinmighan. Ötken ayda radiyomiz we ijtima'iy taratqularda enwer tursun heqqide bérilgen xewerlerdin melum bolushiche, bu yil 50 yashqa kirgen enwer tursun ghulja shehirining herembagh kocha bashqarmisi yéngihayat ahaliler rayonida olturushluq bolup, u oghli ezimet enwerni türkiyede oqutqanliqi üchün oghli bilen birlikte ötken yili tutqun qilin'ghan. Téléfonimizni qobul qilghan yéngihayat tewelikide olturushluq bezi xitay xadim we ahaliler enwer tursunning kimliki we nöwettiki ehwalidin xewersizlikini éytti.

Radiyomizgha kelgen inkasta, enwer tursunning oghlini türkiyede oqutqandin bashqa türkiye istanbuldiki taksim dégen yer namini ghulja shehiridiki dukinining nami qilip qollan'ghanliqi üchün pantürkizm mayilliqi gumani bilen tutulghan؛ ghulja shehiridiki taksim soda dukini jaylashqan bazar tewelikidiki bir dukandarmu enwer tursunning ehwali heqqidiki so'alimizgha jawab bérelmidi. Enwer tursunning kanadada yashawatqan hedisi munewwer, norwégiyede yashawatqan singilliri merhaba we patimelerning bayan qilishiche, enwer tursun oghli ezimet enwerni türkiyede oqutqanliqi üchün xitayning 9 yilliq mejburiy ma'arip tüzümini közge ilmasliq eyiblimisi bilen ötken yili 4 ‏-ayning 29 ‏-küni tutulghan؛ oghul ezimet enwer bolsa uningdin 3 ay burun yeni 1‏-ayning 27 ‏-küni tutulghan.

Ghulja sheherlik saqchi idarisining nöwetchi xadimi tutqun enwer tursun tewe bolghan yéngihayat saqchixanisining téléfon nomurini teminligen bolsimu, emma uning nöwettiki ehwali heqqide melumat bérelmidi. Yéngihayat saqchixanisining bir xadimi, bügün, yeni 8-öktebir küni chüshtin burun enwer tursun heqqide sot échilghanliqini delillidi. Uning bayanliridin melum bolushiche, enwer tursun üstidin échilghan sotqa, enwer tursunning a'ile ezalirimu, enwer tursun tewe bolghan achal ahale komitéti xadimlirimu qatnashturulmighan. Adwokatsiz échilghan bu sotta höküm 3 ay kéyin chiqirishqa qaldurulghan. Sotning jeryanidin yéngihayat saqchixana xadimlirimu xewersiz qilghan. Bu xadim, enwer tursunning türkiye bilen soda qilghanliqi üchün, oghli ezimet enwerning bolsa, xitayning 9 yilliq mejburiy ma'arip tüzümini közge ilmighanliqi üchün tutqunda ikenlikini éytti. Enwer tursun bilen birlikte kimlerning sotlan'ghanliqidin xewersizlikini tilgha alghan bu xadim uning oghli ezimet enwerning téxi sotlanmighanliqini eskertti.

Melum bolushiche 8-öktebir sheklen échilghan bu sotning aldida tutqun enwer tursun ghulja shehiridiki boz türmige qamalghaniken؛ bu sottin kéyin uning yene boz türmige qamalghanliqi yaki bashqa jaygha yötkelgenliki melum emes.

Toluq bet