Gollandiyediki Uyghurlar namayish qilip, taylandtiki Uyghurlarning derhal qoyup bérilishini telep qildi
2025.01.17
16-Yanwar, gollandiyede yashaydighan Uyghurlar paytext amstérdamdiki tayland konsulxanisi aldida namayish qilip, taylandtiki Uyghur musapirlarning derhal qoyup bérilishini telep qilghan. Namayishni gollandiyediki “Uyghur kishilik hoquq fondi” we dunya Uyghur qurultiyining gollandiyediki wekilliri, gollandiye yashlar teshkilati we shundaqla amstérdamda yashaydighan bir qisim Uyghurlar élip barghan.
Bu namayish heqqide, ziyaritimizni qobul qilghan “Uyghur kishilik hoquq fondi” re'isi enwer erdem namayishning teshkillinishi we namayish heqqidiki tepsilatlarni radiyo anglighuchilar bilen ortaqlashti.
Bu qétimqi namayishni teshkilleshning meqsiti, taylandta tutup turuluwatqan 48 neper Uyghurning bixeterlikini qoghdash, ularning üchinchi bir döletke yötkilishige imkaniyet saqlash, tayland hökümitini xelq'ara köchmenler qanuni we kishilik hoquq pirinsiplirigha emel qilishqa chaqiriq qilish bolup, bu namayishqa qatnashqan dunya Uyghur qurultiyi ijra'iye komitéti mu'awin re'isi, gollandiyediki lagér shahiti qelbinur sidiqmu bu namayish heqqide pikrini bayan qildi.
Enwer erdemning bildürüshiche, namayish axirda ular tayland elchixanisigha telepname tapshurghan. Telepnamide üch türlük telep otturigha qoyulghan bolup, hazir taylandta tutulup turuwatqan bu 48 neper Uyghur eger xitaygha qayturulsa, ularning türlük paji'elerge duchar bolidighanliqi alahide eskertilgen.
Taylandta tutulup turuluwatqan 48 neper Uyghurning nechche kün aldida tarqatqan muraji'etnamisi we hazirqi ehwali pütün dunyadiki Uyghurlarni endishige salghan bolup, bu munasiwet bilen dunya Uyghur qurultiyi17-yanwar küni pütün dunya miqyasida keng-kölemlik namayish élip bérishqa chaqiriq qilghanidi.
Gollandiyediki namayish 16-yanwar künige orunlashturulghan bolup, gerche bu normal xizmet küni bolsimu, amstérdam we uning etrapidiki Uyghurlarning qatnishishi bilen bu namayish nahayiti janliq shekilde élip bérilghan.