'5 - Июл' тутқунлири ичидә һәтта 13 яшлиқ өсмүрләрму бар

Сүрәт, 7 - ийул күнидики айаллар вә балилар намайишида тутқун қилинған йаш өсмүрләрдин бириниң хитай сақчилири тәрипидин тутуп елип кетиливатқан көрүнүш.

Көрүнүшләрдин мәлум болушичә, һәр күни йүзләрчә киши тутуп туруш мәркизинң алдида топлишип туруп кирип - чиққучилардин өз пәрзәнтлири яки қериндашлири һәққидә  учур игиллимәктә.

5 ‏- Июл вәқәси йүз бәргинигә 5 айдин ашқан болсиму, бәзи аилиләр һазирғичә тутқунларниң из - дерики һәққидә учур алалмиған. Ашкарилинишичә, 5 ‏- июл тутқунлири тутуп туруш мәркизидики башқа тутқунларға нисбәтән пәрқлиқ,   йәни техиму қаттиқ муамилигә дуч кәлгән.

Бир ханимниң инкас қилишичә, 10 - айниң оттурилириға қәдәр 5 ‏- июл тутқунлири башқа тутқунларға нисбәтән йемәк - ичмәк қатарлиқ шәрт - шараит мәсилисидә чәклимигә учриған.

Бу қетимқи тутқунда бәзи аилиләрдә ака - ука, дада - бала тутқун қилинған һәтта бәзиләр аилә бойичә тутқун қилинған.

Ашкариланған мәлуматлар ичидә диққәткә сазавири тутқунларниң яш мәсилисидур.

'Ихтияри мухбир' җәмий 4 кишини зиярәт қилған, буларниң ичидә 3 киши тутулуп кәткән балилириниң 15 яшлиқ өсмүрләр икәнликини билдүргән. Бу сөһбәттики авазлардин, бир кишиниң балисиниң техи 13 яшлиқ өсмүр икәнлики мәлум болмақта. Шундақла, мана бу мәлуматлардин, 5 ‏- июл тутқунлири арисида 15 яш әтрапидики вә  15 яштин төвән яштики тутқунлар саниниң аз әмәслики ашкариланмақта.

Хитай, 5 ‏- июл вәқәсини қанунға асасән бир тәрәп қиливатқанлиқини билдүрмәктә. Әмма уйғур тәшкилатлири болса, хитайниң 5 ‏- июлдин кейинки тутқун вә бастуруш һәрикәтлирини қанунға асасән әмәс һөҗҗәткә асасән йәни сиясий буйруқ бойичә иҗра қиливатқанлиқини илгири сүрмәктә.

Юқиридики аваз улинишидин, бу һәқтики мәлуматимизниң тәпсилатини аңлайсиләр.