Аччиқсудин зәһәрлинип өлгүчиләр саниниң ешип кетишигә вәқәни йошуруш сәвәб болған

Зәһәрлинишни кәлтүрүп чиқарған аччиқсуму яки аччиқсу қачиланған бакму? вәқәниң мәсулийити зәһәрлик аччиқ суни ясиғучидиму, сатқучидиму яки башқурғучидиму? вәқә пәқәтла бир диққәтсизлик яки мәсулийәтсизликтин келип чиқтиму? яки навағ вәқәсидин кейин милләтләр мунасивити күнсери яманлишиватқан хотәндә, бир қәстләш, өч елиш һәрикити йүз бәрдиму?
Мухбиримиз шөһрәт һошур
2011.11.23

Мана бу соаллар нөвәттә хотәндики аччиқсудин зәһәрлинип өлгүчиләр аилә - тавабати вә йеқинлирини биаарам қииватқан, әмма җаваби тепилмайватқан соаллардур. Нөвәттә мәлум болғини пәқәт, аччиқсудин зәһәрлиниш байқалған һаман вәқәниң ахбаратқа ашкариланмаслиқи, сир тутулуши, нәтиҗидә зәһәрләнгүчиләрниң дохтурханиға вақтида баралмаслиқи сәвәблик вәқәдә өлгүчиләр саниниң көпийип кетишидур.

Мәлум болушичә, шу күни зәһәрлиништин өлгән тунҗи киши кәч саәт 10 да җан үзгән. Дохтурхана мәсуллири йеза вә наһийә мәсуллириға әһвални доклат қилип, аһалиләргә дәрһал уқтуруш тарқитишни тәвсийә қилған болсиму, йәрлик даириләр вәқәни тәшвиқ қилишни тоғра тапмиған. Нәтиҗидә зәһәрләнгүчиләр әтиси әтигәнгә қәдәр өзлириниң аччиқсудин зәһәрләнгәнликини биләлмигән вә дохтурханиға кечикип барған.

Йәрлик даириләрниң ашкарилишичә, вәқә дәсләптә аһалиләрдин йошурулған болса, кейинки мәзгилдә вәқәниң тәрәққияти вә тәпсилати йәрлик даириләрдинму йошурулған. Вәқәгә алақидар барлиқ сан - сепир, сәвәб - нәтиҗиләр җ х тармақлири вә сәһийә орунлири тәрипидин контрол қилинған.

Вәқәниң тәпсилатиниң сир тутулуши, тегишлик чүшәндүрүшләрниң берилмәслики, вәқәгә алақидар бирәр кишиниңму җавабкарлиққа тартилмаслиқи нөвәттә амма ариисида түрлүк гуман вә наразилиқ пәйда қилмақта.

Һөрмәтлик радио аңлиғучилар, юқирида рамизан мәзгилидә хотәндә йүз бәргән, аччиқсудин зәһәрлиниш вәқәсигә аит бир қисим учур вә инкасларни диққитиңларға сундуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.