Ағу йезисиниң партком секретари хән шяшең деһқан иляс аббасни урған

Уйғур елиниң җәнубий вилайәтлиридики хитай партком секретарлири һоқуқ вә имтиязлиридин пайдилинип, йезиларни өз хаһиши вә өзиниң хуй-пәйли бойичә зорлуқ-зомбулуқ билән идарә қилмақта.
Мухбиримиз шөһрәт һошур
2011-01-13
Share
Abdurehim-Mollek-boway-Beijing-kowruk-astida-305 Сүрәт, абдуреһим бовайниң бейҗиңдики "әрздарлар" туридиған көврүк астида бошүн тори мухбири 18 - авғуст тартқан сүрити.
http://news.boxun.com Дин елинди.

Биз алдинқи программилиримизда, куча наһийиниң ағу йезисидики 56 аилилик деһқанниң терилғу йәрлириниң төмүр йол қурулуши сәвәблик тартивелинғанлиқи вә дөләт тәрипидин берилгән йәр төләм пулиниңму йеримидин көп қисминиң даириләр тәрипидин игиливелинғанлиқи, шундақла бу аилиләр юқириға әрз сунғанда йеза рәһбәрлири тәрипидин тәһдиткә учриғанлиқи һәққидә хәвәр бәргән идуқ.

Мухбиримизниң бүгүнки әһвал игилишичә, бу тәһдитләр җәрянида йезилиқ партком секретари хән шяшеңниң деһқан иляс аббасни урғанлиқини ашкариланди. 

Итай һөкүмитиниң алақидар һөҗҗәт вә ахбаратлиридин мәлум болушичә, нөвәттә уйғур елиниң җәнубий вилайәтлиридики йезиларниң көпинчисиниң йезилиқ партком секретарлири хитай миллитидин бәлгилинип кәлмәктә. Нопуси 100% дегүдәк уйғур болған бу йезиларниң барлиқ мәмурий вә иқтисадий һоқуқи мәзкур хитай партком секретарлириниң қолиға мәркәзләшкән.

Радиомизға кәлгән инкаслардин мәлум болушичә, йезилардики бу хитай партком секретарлири һоқуқ вә имтиязлиридин пайдилинип, бу йезиларни қанун вә бәлгилимиләр бойичә әмәс, бәлки өз хаһиши вә өзиниң хуй-пәйли бойичә зорлуқ-зомбулуқ билән идарә қилмақта. Бирқанчә айниң алдида ақсуниң қизил деһқанчилиқ мәйданиниң партком секретари хән җяменниң 84 яшлиқ абдуреһим молләк акини көпчиликниң алдида тиллиғанлиқи вә дүшкәлигәнлики ашкариланған иди. Бүгүн ашкарилинишичә, кучаниң ағу йезилиқ партком секретари хән шяшең, бу йезидики деһқан иляс аббасни урған. Иляс аббас хән шяшеңниң өзини урғанлиқини ашкарилиған.

Биз бу вәқә тоғрисида йеза мәсуллиридин муса раһман вә турсун муһәммәдләрни зиярәт қилдуқ. Әмма улар, секретар хән шяшеңниң иляс аббасни урғанлиқини инкар қилди. Бирақ, йезидики кимликини ашкарилашни халимиған деһқанлар, йезидики барлиқ чоң кичик башлиқларниң, секретар хән шяшеңниң қол -чомақчилири икәнликини, униң һәрқандақ зораванлиқиға чапан япидиғанлиқини билдүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт