Америка демократлири өз партийисидин президент вә муавин президент намзатини бекитти

Обама билән муавин президент намзати җо байдин, демокиратлар қурултийида бир - бирини қутлуқлашмақта.

 Хиларий клинтон өз қоллиғучилирини обамани қоллашқа чақирди

Илгири пәрәз қилинғиниға охшаш, барак обама вә җо байдин айрим - айрим һалда президент вә муавин президент намзати қилип бекитилди вә рәсмий җакарланди.

Қаримаққа илгири барак обама билән өз партийисидин президентлиқ намзатлиқи риқабитигә чүшкән, һәмдә бу җәрянда 17 милйондин артуқ қоллиғучиға еришкән күчлүк намзат вә палата әзаси хиларий клинтон ханим, мәзкур вәкилләр қурултийиниң беләт ташлаш усулиниң өз партийиси ичидә бөлгүнчилик кәлтүрүп чиқиришидин әнсиригәндәк қилатти.

Хиларий клинтон ханим беләт ташлаш усулини бикар қилип барак обамани рәсмий намзат қилип җакарлашни тәләп қилди.

Президент намзатини бекитиш мурасимиға америка дөләтлик авам палата рәиси, демократлар дөләтлик вәкилләр қурултийиниң мәңгүлүк рәиси нәнсий пелоси ханим риясәтчилик қилди. У йиғин қатнашқучилиридин " әгәр барак обаманиң намзатлиқиға қошулсаңлар қошулимиз дәп җаваб бериңлар" дәп сориғанда йиғин әһлиниң һәммиси дегүдәк қошулидиғанлиқини билдүрүшти. Шуниң билән барак обама вә җо байдинларниң президент вә муавин президентлиқ намзатлиқи рәсими җакарланди.

Клинтон : " барак обама америкиниң дунядики орнини тикләшкә тәйярланди "

Бүгүн бу мурасим бәкму һаяҗанлиқ ичидә өткән болуп, бәзиләр көз йешини тохтиталмиди . Шу күни кәчқурун сабиқ президент бил клинтон нутуқ сөзләп барак обаманиң һаят тәҗрибиси вә җо байдиндәк ақил кишини муавин президент намзати қилип таллиғанлиқиға юқири баһа бәрди вә : " демократ қериндашлар, силәргә шуни ейтимәнки барак обама дөлитимизни йетәкләшкә вә америкиниң дунядики орнини тикләшкә тәйярланди" деди.

Сабиқ президент клинтон йәнә мундақ деди: " барак обама қәсәм берип америкиниң қанунини сақлаш вә уни қоғдашқа тәйяр болди. Барак обама америка қошма штатлириниң президенти болушқа тәйярланди".

Муавин президент намзати җо байдин обаманиң дипломатийә ишлиридики һәқиқий толуқлиғучиси

Шу күни кәчқурун, муавин президентлиқ намзати җо байдин өзиниң бу намзатлиқини рәсмий қобул қилғанлиқини җакарлиди. Җо байдин мундақ деди: " шундақ, шундақ, мән силәрниң мени америкиниң келәр нөвәтлик президенти барак обама билән биллә хизмәт қилишқа намзат қилип таллиғиниңларни қобул қилдим"

У йәнә җәмийәткә вәдә берип, муавин президент ишханисиниң һәр заман улар үчүн очуқ икәнликини билдүрди.
Барак обама деливейр штати вәкили, америка палата әзаси җо байдинни муавин президентлиқ намзати қилип таллиған. Улар 23 - авғуст шәнбә күни илиниой шитатиниң сприң фийилд районида тунҗи қетим җамаәт билән көрүшкән иди.

Җо байдинниң муавин президентлиқ намзати қилип талланғанлиқи вә бүгүн рәсмий бекитилгәнликигә қарита пикир баян қилған масачустс штати демократлар партийиси вәкили ралф җордин, җо байдинниң ташқи ишлар вә чәтәлләр билән болған дипломатийә мунасивәтлиридә интайин тәҗрибилик икәнликини, униң бу җәһәтләрдә барак обаманиң һәқиқий толуқлиғучиси болуп кетәләйдиғанлиқини, шуңлашқа җо байдинни муавин президент қилип таллашниң интайин ақиланилик икәнликини вә сайламда буларниң утуп чиқишида интайин муһим әһмийәткә игә икәнликини илгири сүрди.