Ишпийон гумандари бабур мәхсут һәққидә йәнә сот ечилди

Ишпийон гумандари бабур мәхсут. 2007-Йили 7-май.

Сот стокһолим вақти саәт 12 дә башлинип 1 дә ахирлашти. Сот ечишни гумандар бабур мәхсутниң адвокати тәләп қилған болуп, адвокат сотта шиветсийә қануни буйичә гумандарни һөкүмисиз тутуп туруш вақти ешип кәткәнликини асас қилип туруп, гумандарни аилисигә қойиветип тәкшүрүшни давамлаштурушни оттуриға қойған.

Сот бабурниң адвокатиниң тәлипини вә бабурниң делосиға мәсул баш тәптишниң пикирини аңлиғандин кейин , сотчи сот һөкүмини оқуп өтти. Сотчи шиветсийә қануни буйичә гумандарни йәнә давамлиқ тутуп туривәрсә болмайдиғанлиқини, сот ахирлашқан һаман өйигә қайтип давамлиқ тәкшүрүшни қобул қилидиғанлиқини, әмма бир қанчә шәрти барлиқини билдүрди.

Гумандар бабур мәхсут шиветсийә қануни буйичә һазирдин башлап әркин, әмма назарәт астида давамлиқ тәкшүрүшни қобул қилиду. Бабур мәхсутниң паспорти тартивелинип, стокһолмдин сирт җайларға бериши чәклиниду. Һәр һәптидә 3 күн йәни дүшәнбә, чаршәнбә вә җүмә күнлири кичиккәндә кәч саәт 5 тин бурун сақчиғаниға берип әнгә алдуриду. Киләр қетимлиқ сот 9 - айниң 25 - күни саәт 11 дә ечилиду.

Сот җәрянидин мәлум болушчә , ишпийон гумандари бабур мәхсутниң ахирқи сот һөкүминиң кечиктүрүлуши, униң делосиниң җәряни бир қәдәр мурәккәп, четишлиқ даириси кәңри, бәзи мәсилиләр инчикә болғанлиқи үчүн тәпсилий тәкшүрүш вә тәқиқләшни тәләп қилидикән.

Бәзи учурлардин мәлум болушчә, гумандар бабур мәхсутниң ишпийонлуқ һәрикити ялғуз шиветсийидики уйғурларниң материялини хитай консулиға йәткүзүш билән чәкләнмәстин йәнә , дуня уйғур қурултийиға мунасивәтлик учурларниму йәткүзүшкә четилидикән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.