Béyjingdiki Uyghur erzdarlar muqimsizliq amili dep qarilip zerbige uchrimaqta

Bu sewebtin xitay saqchiliri béyjingdiki Uyghur erzdarlarni muqimsizliq amili dep qarap, ulargha nuqtiliq zerbe bérishke bashlighan. Ötken hepte axiri Uyghur erzdarlar turuwatqan chédir ikkinchi qétim buzuwétilgen, erzdar ömerjan abla, erzdarlarning kattiwéshi dep qarilip tutup kétilgen.

Ottura sherqte isyan kötürülgen we xitayda yasimen namayishi bash kötürgendin kéyin, xitay béyjingdiki Uyghur erzdarlargha qarita nazaretni kücheytken idi. Melum bolushiche,xitay saqchiliri birqanche heptidin béri béyjingdiki Uyghur erzdarlargha qarita mexsus zerbe bérish herikiti bashlighan.

Üch heptining aldida tutup kétilgen we arqidin qoyuwétilgen Uyghur erzdarlardin biri tursunjan ghopurdur. U Uyghur erzdarlarning nöwettiki ehwali heqqide melumat berdi.

Béyjingdiki Uyghur erzdarlar öz milliy en'eniliri boyiche öz ‏-ara hemkarlishish we yol körsitish arqiliq öz erzlirini dawam qilip kéliwatqan. Igilishimizche, Uyghur erzdarlarning öz-ara inaqliqi we intizamchanliqi xitay saqchi organlirining xéli burunla diqqitini tartqan. Ularning birlikte yashishi teshkilatqa uyushush dep qaralghan. Ularning ichidiki tejribilik we aktipraqliri teshkilatning kattiwéshi dep tonulghan. Bu ehwal birqanche ayning aldida qeshqerdiki bir saqchi xadimini ziyaret qilghan chéghimizda ashkarilan'ghan.

Yuqirida béyjingdiki Uyghur erzdarlargha muqimsizliq amili dep qarilip zerbe bériliwatqanliqi heqqide xewer anglattuq.