Uyghur déhqanlirining “Démokratik saylam” heqqidiki bayanliri

Uyghur aptonom rayon da'irilirining hökümet tor betliride bultur oqush püttürgen bir qisim aliy mektep oqughuchilirining émtihan arqiliq, Uyghur yézilirigha yéza kadirliri qilip teyinlen'genliki heqqidiki xewerler bérildi.

Bu xil xewerlerde yene, bu yil etiyazliq térilghudin ilgiri Uyghur yézilirida her 3 yilda bir élip bérilidighan kent bashliqlirini démokratik saylash pa'aliyiti élip bérilip, déhqanlarning öz könglidikidek kishilerni kent bashliqi qilip saylighanliqi xewer qilindi.

Emma ziyaritimizni qobul qilghan Uyghur déhqanliri, hökümet da'iriliri uqturushida élan qilin'ghan,“Aliy mektep tügetkenlerni émtihan arqiliq yéza kadirliri qilip teyinlesh, kent bashliqlirini démokratik usulda saylash” sho'arining yenila qeghez yüzidiki siyah ikenlikini bildürüshti.

Xotendin ziyaritimizni qobul qilghan bir déhqan, özining téléwizor hem gézitlerdin aliy mektep oqughuchilirining yéza kadiri qilip belgilen'genliki heqqidiki xewerlerni anglighanliqini, emma ular turushluq kentte, kent bashliqining 5-10 yildimu almashmaydighanliqini, shundaqla yéngidin belgilinidighan kent bashliqlirining yillardin buyan, yéziliq hem nahiyilik hökümettiki emeldarlarning körsitishi bilen saylinip kéliwatqanliqini bildürdi.

Bu déhqan bizning erkin asiya radi'osidin téléfon qiliwatqinimizni bilgendin kéyin, aldi bilen özlirining hökümetning hazirqi siyasitidin razi ikenlikini bildürdi. Andin hazirche déhqanlarning yéza kadirlirining ehwali heqqide birnerse déyelmeydighanliqini, ulargha kent bashliqlirining 5 yilda bir qétim saylinidighanliqi heqqide uqturush qilin'ghan bolsimu, lékin ularning kentidiki kent bashliqi hem sékrétarning 10 nechche yildin buyan almashmighanliqini, déhqanlarning yéza kadirlirining xizmitidin könglide narazi bolsimu, lékin héchnéme déyelmeydighanliqini ilgiri sürdi.

Ili rayonidin ziyaritimizni qobul qilghan yene bireylen bizge, özliri turushluq kentte yillardin buyan déhqanlar qattiq narazi bolup kéliwatqan abdusemet isimlik kent bashliqining hökümet xizmitini aktip ishligini üchün, yéziliq hökümetning békitishi bilen bu yil yenila öz ornida kent bashliqi bolup qélishi mumkinlikini bildürdi.

Shu kenttin ziyaritimizni qobul qilghan yene bireylen sözide, 3 yil ilgiri abdusemet kent bashliqi bolup saylan'ghan chéghida, déhqanlar qattiq narazi bolghan bolsimu, yéziliq hökümetning bésim qilishi bilen, abdusemetning kent bashliqi bolup saylan'ghanliqini, eyni chaghda yéziliq hökümet hem nahiyilik hökümetning kentke saqchi xadimlirini ewetip, abdusemetni saylashqa narazi bolghan kishilerni qolgha élip kétidighanliqini agahlandurup, déhqanlargha bésim ishletkenlikini bayan qildi.

Ziyaritimizni qobul qilghan déhqanlar öz etrapida boluwatqan naheqchiliklerni körüp tursimu, emma bu naheqchilikler heqqide yurt ichide qaynap sözlesh bilenla qalidighanliqini, hazirche déhqanlarning awazini héqiqi anglaydighan jay bolmighanliqi üchün, özlirining bu xil naheqchilikler üstidin erz qilip, téximu yuqiri orunlargha bérishtin waz kechkenlikini, emma déhqanlarni naraziliqini qozghighan yéza kadirlirining yenila xelq arisida lenetke qalidighanliqini, xelqning bu xil kishilerni öz qoynigha almaydighanliqini bildürdi.