Дилбәр тохтиниң әрзи тосалғуларға учримақта

Биз илгирики бир нәччә қетимлиқ аңлитишлиримизда, уйғур елиниң йәкән наһийисидин дилбәр тохти ханимниң, әркин асия радио истансисиниң уйғур бөлүмигә йоллиған шикайәт хетидә, ери мәмәт турсун ташниң йәкән гүлбағ сақчиханисидики сақчилар тәрипидин сорақ җәрянида таяқ зәрбисидин уруп өлтүрүлгәнлики һәққидики хәвәрни вә мушу мунасивәт билән дилбәр тохти ханим билән елип барған сөһбәт хатирисини аңлатқан идуқ.
Мухбиримиз миһрибан
2009-06-08
Елхәт
Пикир
Share
Принт
Йәкән наһийисидики дилбәр тохти ханимниң, йәкән сақчиханида тайақ зәрбисидин өлгән ери мәмәт турсун ташниң өлүмидин бурунқи балиси билән чүшкән сүрити.
Йәкән наһийисидики дилбәр тохти ханимниң, йәкән сақчиханида тайақ зәрбисидин өлгән ери мәмәт турсун ташниң өлүмидин бурунқи балиси билән чүшкән сүрити.
Сүрәтни өзини ашкарилашни халимиған бирси RFA гә әвәткән.

Сөһбәт җәрянида дилбәр тохти ханим бизгә ериниң наһәқ өлүп кәткән болсиму, әмма йәкән наһийилик һөкүмәтниң бу делодики 2 нәпәр сақчини җазалимай, бу делони мурәссә билән бир тәрәп қилғанлиқини, өзлириниң мурәссәгә қайил болмай әрз қиливатқанлиқини баян қилған иди.

Дилбәр тохти әрзини давамлаштуруватамду ? униң әрзни давамлаштурушиға йәкән наһийилик һөкүмәт йәнә қандақ тосқунлуқларни қиливатиду ?
 
Дилбәр тохти ханим 6 - айниң 5 - күни бизниң зияритимизни қобул қилғинида, өзлириниң үрүмчи вә қәшқәрдә тутқан адвокатлириниң һазир бу әрзни дава қилиштин баш тартиватқанлиқини, шуңа дадисиниң үрүмчигә хуй вәнмиң исимлик адвокат билән көрүшкили кәткәнликини, адвокатниң бу ишни қанчилик һәл қилалиши йәнила йәкән һөкүмәт даирилиригә бағлиқ икәнликини баян қилди.

Дилбәр тохти, бу делоға сәвәбкар болған сақчиниң қәшқәр вилайәтлик вали мәһкимисидә юқири дәриҗилик әмәлдар туғқини болғини учун,өзлириниң әрз җәряниниң йәкән наһийилик һөкүмәт даирилири тәрипидин давамлиқ тосқунлуққа учрап келиватқанлиқини баян қилип өтти.

Биз дилбәр тохти турушлуқ аһалиләр райониниң башлиқи алим әпәнди билән соһбәтләшкинимиздә, алим әпәнди өзлириниң дилбәр тохтиға давамлиқ әрз қиливеришниң иқтисади җәһәттин дилбәрниң аилисигә бесим болидиғанлиқини, шуңа өзиниң дилбәр тохтиға өлгән адәм учун давамлиқ әрз қиливәрмәй " бейиш йолиға қарап меңишқа нәсиһәт қилған" лиқини баян қилди.

Дилбәр тохтиниң әрзини қобул қилған уйғур аптоном районлуқ әдлийә идарисиниң хадими адил әпәнди, өзлириниң пәқәт бу делониң һәқ - тәләп қисмиға мәсул икәнликини, йәни дилбәр тохтиниң йәкән наһийилик һөкүмәт залида, җамаәт гуваһлиқ орни хадимлири алдида 50 миң юән хәлқ пулини алғанлиқини, пүткүл тәртипниң қануни йол бойичә болғанлиқини баян қилди.

Адил әпәнди йәнә, сақчиларниң мәмәт турсун ташни уруп өлтүрүвәткәнлики болса җинайи ишлар әнзисигә ятидиғанлиқини, бу ишни дилбәр тохтиниң давамлиқ әрз қилса болидиғанлиқини баян қилди.

Биз бүгүн 6 - айниң 8 - күни кечидә дилбәр тохти билән сөһбәтлишиш учун телефон қилғинимизда, аниси униң өйдә йоқлуқини ейтти.

Дилбәр тохтиниң сиңлисиниң баян қилишичә, уларниң дадиси тохти һошур ака, үрүмчидин мәҗбурий қайтурулуп келингән болуп, һазир қәшқәр 12 - дохтурханида икән.

Уйғур паалийәтчилириниң баян қилишичә, уйғур илидә мәмәт турсун ташниң өлүмидәк наһәқ делолар наһайити көп болуп, һөкүмәт органлириниң, қанунни иҗра қилидиған җамаәт хәвпсизлик идарилириға болған қануни башқурушиниң бош болуши, бу ишларни һәл қилидиған юқири дәриҗилик органларниң тутқан позитсийиси сус, ишни бир ‏ - биригә дөңгәп вақтида һәл қилиш тәдбири қоланмиғанлиқи, техиму муһими йәрлик әмәлдарларниң өз уруқ - туғқанлириға ян бесип, делониң һәл болушиға қийинчилиқ туғдурғанлиқи шундақла қанун органлиридики парихорлуқ қатарлиқлар наһәқчиликләрниң әвҗ елишиға сәвәб болмақта икән.


Пикирләр (0)
Share
Толуқ бәт