Хитай һөкүмити уйғур аптоном районида 'дөләт байримини қоғдаш' үчүн 200 миң сақчи сәпәрвәр қилған

Үрүмчи хәлқ мәйдани әтрапидики, олимпик мәшәл узитиш паалийити үчүн, хитай сақчилири тәрипидин қамал қилинған кочилар. 2008-Йили 17-июн,

 Меһманханилар, иҗаригә берилгән өйләр тәкшүрүш нишани

Хитай һөкүмитиниң бу һәрикитидә меһманханилар, иҗаригә берилгән өйләр, һәтта йирақ җайлардики мәһәллиләрму тәкшүрүш нишани қилинидикән.

Хоңкоңда чиқидиған 'җәнубий хитай сәһәр гезити' дә баян қилинишичә, хитай һөкүмити уйғур аптоном районида пиланлиған бу һәрикәтни қәшқәр, кучар, хотән қатарлиқ сәзгүр районларда техиму қаттиқ елип баридикән. Әгәр хитай һөкүмити мәлум бир кишини 'җинайәтчи' дәп қариса, униң аилиси, уруғ-туғқанлири, хулум-қошнилиридин һәтта пүтүн мәһәллидин җавабкарлиқ сүрүштүридиғанлиқини җакарлиған.

Хитай һөкүмитиниң бу һәрикити хәлқара қанунларғиму, өзиниң дөләт қануниғиму хилап

Вашингтондики кристайн яң адвокат ширкитиниң уйғур адвокати нури түркәл әпәндиниң қаришичә, хитай һөкүмитиниң бу һәрикити хәлқара қанунларғиму, өзиниң дөләт қануниғиму хилап.

Аилиси, хулум-хошнилириму гунаһкар, дегәнни қанун тили билән чүшәндүрүш мумкин әмәс

Уйғур адвокат нури түркәл әпәнди хитайдики қанун билән хәлқарадики қанунларни селиштуруп көрсәтти. Униң ейтишичә, бир киши аталмиш гунаһкар болған болса, униң аилиси, хулум-қошнилириму гунаһкар болиду, дегәнни қанун сөзи бойичә яки мәнтиқә бойичә чүшәндүрүш мумкин әмәс.

Бу --хитайниң уйғурға қоллиниватқан сиясәтлириниң мәғлуб болғанлиқи

Уйғур адвокат нури түркәл әпәндиниң қаришичә, хитай һөкүмитиниң һазир 'дөләт байримини қоғдаш' дегән нам билән 200 миң сақчи орунлаштурғанлиқи-- хитайниң уйғурға қарита қоллинип келиватқан сиясәтлириниң мәғлуб болғанлиқи. Хитай һөкүмити өзиниң сиясәтлиридики хаталиқларни тәкшүрүши керәк.