Д у қ вәкилиниң яврупа бирлигидики хизмәтлири үнүмлүк елип берилмақта

Сүрәт, 6 - өктәбир, дунйа уйғур қурултийиниң йаврупа бирликидики вәкили мәмәт тохти әпәнди, йавропа солчил иттипақдашлар бирликиниң муавин рәиси такис һадҗигеоргио әпәндини зийарәт қилғандики көрүнүш.

У яврупа бирлики вә яврупа комисюнидики хитайға мунасивәтлик сиясәт бәлгиләйдиған шуниңдәк бу һәқтә сөзләш һәққи бар юқири дәриҗилик хадимлар билән учришип, уйғур хәлқиниң һазирқи муһим вәзийитини аңлитиш билән биргә, уйғур миллий һәрикитиниң рәһбири рабийә қадир ханимниң хитай түрмисигә қамилип, давалиниш һәққигә еришәлмәйватқан оғли алим абдуреһимниң вәзийитигә көңүл бөлүшини тәләп қилди.

Яврупа бирлики, яврупа бирликигә әза 27 дөләтниң омумий гәвдиси сүпитидә қурулған болуп, яврупа бирлики йәнә ортақ парламент вә ортақ һөкүмәткә игә, яврупа комисюни дәп атилидиған яврупа һөкүмитидин сирт, яврупа бирликиниң алий соти, яврупа алий кеңиши қатарлиқ хизмәт органлири тәсис қилинған, бу органларниң һәммиси пүтүн яврупа бирликигә әза дөләтләрдин кәлгән вәкилләрниң ортақ иштираки һәмдә мақуллуқи билән яврупа бирликигә мунасивәтлик һалда қарарларни бекитиш, сиясәт йүргүзүш вәзипилирини өтәйду. Буниң ичидә хитай билән болған мунасивәтму яврупа бирликиниң муһим сиясәтлиридин бири һесаблиниду.

Шуңа дуня уйғур қурултийи һәм яврупа парламентида һәм яврупа комиссиюнида паалийәт елип беришни нөвәттики әң муһим хизмәт күн тәртипигә киргүзүп, мәмәт тохти әпәндини мәхсус яврупа бирликидә уйғур давасини тонуштуруш паалийити елип беришқа бәлгилигән.

40 Кунлүк хизмәт паалийити һәққидә мәлумат бәргән мәмәт тохти әпәнди, яврупа парламенти вә яврупа комисюнидики муһим әрбаблар билән көрүшүп сөһбәт елип барғандин башқа, яврупа бирликиниң ташқи сиясәтлиригә бивастә тәсир көрситидиған, муһим истратегийиләрни бәлгиләйдиған тәтқиқат органлири билән алақә орнитип тегишлик хизмәтләрни елип бериватқанлиқини билдүрди.

Мәмәт тохти әпәнди сөзидә йәнә, 14 ‏- өктәбир күни яврупа парламентидики асаслиқ әзалар, болупму ташқи ишлар комитети вә инсан һәқилири комитетиниң рәиси вә муавин рәиси қатарлиқ кишиләр билән учришип, яврупа комисиюнидин, уйғур мәсилилири һәққидә конкрет соалларни сораш тоғрисида илтимас сунғанлиқини билдүрди.

Мәмәт тохти әпәндиниң ейтишичә, яврупа бирликиниң ташқи ишлар комитети билән инсан һәқлири комитетиниң уйғурларға қаратқан ярдимини күчәйтиш үчүн бир қатар хизмәтләр ишләнгәндин сирт, ялғуз яврупа парламентиниңла әмәс, бәлки яврупа комисюниниңму уйғурлар үчүн көңүл бөлүшини қолға кәлтүрүш пиланлири түзүлүватқанлиқини билдүрди.

Дуня уйғур қурултйиниң вәкили мәмәт тохти әпәнди, яврупа бирликидә уйғурларниң сиясий вәзийитини яхшилаш үчүн елип бериливатқан хизмәтләрниң үнүмлүк нәтиҗә беридиғанлиқидин үмидвар икәнликини тәкитлимәктә.

Юқиридики аваз улинишидин, бу һәқтики мәлуматимизниң тәпсилатини аңлайсиләр.