Д у қ хәвәрнамиси нәширдин чиқмақта

Сүрәт, 3 - сентәбир күни тарқитилған "хәвәрнамә" ниң 1 - қисмидин көрүнүш.

"Хәвәрнамә" ниң 1 - қисми, 3 - сентәбир күни тарқитилған болуп, униңда 5 - июл вәқәсиниң бир йиллиқи мунасивити билән дуняниң һәрқайси җайлиридики уйғурлар мәркәзлишип олтурақлашқан 17 дөләттә елип берилған намайиш вә башқа сиясий йиғилишлар тоғрисида мәлуматлар берилгән иди.
 
"Хәвәрнамә" ниң 2 - қисмида болса, техиму көп мәзмунлар орун алған. Д у қ рәиси рабийә қадир ханим башчилиқидики қурултай хадимлириниң сиясий паалийәтлири, хитай һөкүмитиниң уйғурлар үстидин йүргүзүватқан диний бесим сиясити, уйғур вәтинидики мухбирлар вә тор бәт мәсуллириниң паҗиәлик тәқдири, хитайниң уйғурларниң ички әзалирини сетиштәк инсанийәтсиз қилмишлириниң барғансери көпийип бериватқанлиқи, үзлүксиз давамлишиватқан өлүм җазаси вә қамақ җазалири қатарлиқ җиддий мәсилиләр пакитлар билән оттуриға қоюлған.
 
Инглизчә вә немисчә тилларда нәшир қилиниватқан бу хәвәрнаминиң 2 - қисминиң ахириға, ғәрб мәтбуатлирида елан қилинған уйғурларға мунасивәтлик мақалилар вә учурларға аит қанчә онлиған торбәт, гезит - журнал адреслири қошуп берилгән.
 
Д у қ баш шитабиға йеңидин хизмәткә чүшкән, мәзкур хәвәрнамини ишләшкә мәсул болған германийилик зиялий җана брандт ханим бу мунасивәт билән зияритимизни қобул қилип, бу хәвәрнамида асаслиқ һалда д у қ ниң елип бериватқан сиясий паалийәтлири, шәрқий түркистанниң омумий вәзийити тоғрисидики учурлар, д у қ ниң бундин кейин елип барғуси паалийәтлири қатарлиқлардин ибарәт икәнлики, мәзкур хәвәрнамини һәр айда бир сан нәшир қилидиғанлиқи һәмдә дуняниң һәрқайси җайлиридики д у қ билән алақиси болған органлар һәм шәхсләргә әвәтидиғанлиқини билдүрди.
 
Долқун әйса әпәнди бу хәвәрнаминиң явропа парламенти, америка дөләт мәҗлиси, б д т вә хәлқарадики кишилик һоқуқ тәшкилатлириға қәдәр йоллинидиғанлиқи, уйғур дәвасиға қизиққанлики кишиләргә елхәт арқилиқ әвәтип берилидиғанлиқини ейтти.
 
Мәзкур хәвәрнамини ишләватқан д у қ хизмәтчиси җана брандт ханим, хәвәрнаминиң дәсләпки икки нусхисиниң көңүлдикидәк ишләнгәнликини, нурғунлиған хәлқаралиқ тәшкилатларниң көп мәмнун болғанлиқини билдүрүп өтти.
 
Хәвәрнамә көп хил темилар астида сүрәтлик мәзмунлар вә уйғур миллитиниң нөвәттә дуч келиватқан еғир вәзийитигә аит дәлил - испатларни муһим нуқта қилғандин сирт, чәтәл қәләмкәшлири тәрипидин елан қилинған хәвәрләр вә мақалиларниң адреслириниму тәминләшкә әһмийәт бәргән. Бу сәвәблик, мәзкур хәвәрнамә йеқин кәлгүсидә д у қ ниң әң яхши бир тәшвиқат қоралиға айлиниши мумкин икән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.