5-Iyuldin kéyin iz-déreksiz ghayib bolghanlar (11)

Ashkarilinishiche, “5‏-Iyul” din kéyin ghayib bolghanlardin biri kompartiye ezasidur. Tijaretchi abdughéni ezizning kompartiye ezasiliq salahiyiti, hetta ürümchide wezipe ötewatqan xitay eskerlirige su we tawuz sunup körsetken sadaqiti uni tutulush we ghayib bolushtin qoghdap qalalmighan. Uning Uyghurgha xas chirayi we Uyghurche ismining özila jinayet gumandari sanilishqa yéterlik asas bolghan bolsa kérek.

Abdughéni eziz 1970-yili xoten qaraqashta tughulghan. U toluq ottura mektepni püttürgendin kéyin bir mehel kent ahaliler komitétida xizmet qilghan. U 1997-yili xitay kompartiyisige eza bolghan. U, 2006-yili ürümchige yötkilip bérip öy-mülük uchur mulazimet shirkiti qurghan we qisqa waqit ichide igilik tikligen. 5-Iyul weqesi yüz bérish bilen tijariti toxtashqa mejbur bolghan abdughéni, ürümchide weziyetning téz normallishini töt közi bilen kütken؛ u ürümchi kochilirida wezipe ötewatqan xitay saqchi we eskerlirige öz minnetdarliqinimu ipadiligen؛ yeni 5-köwrükte nöwette turuwatqan xitay eskerlirige ichimlik su we tawuz teqdim qilghan.

7-Ayning 31-künige kelgende 7 neper xitay saqchisi uni, ürümchining shinxu'a jenubi yol, 56-nomur, 8-bina, 602-nomurluq öyidin tutup ketken. Saqchilar uni tutqanda uning yéngi santana mashinisi we 2600 yüen neq pulinimu élip ketken. Uning birlikte tutulghan bortalaliq tijaretchi mewlan zéridin 5 aydin kéyin qoyup bérilgen؛ emma xitay kompartiye ezasi abdughéni ezizdin 2010-yili 4-ayning 27-künidin étibaren héchqandaq uchur melum emes. Uning inisi rozimemet 3 yil ichide ürümchige 20 qétim barghan. Bu jeryanda xitay terep uning kompartiye ezasiliq salahiyitini tonumighan, herbiylerge körsetken sadaqitinimu hésabqa qatmighan؛ shunga uning a'ilisi bashqa ghayiblar a'ile-tawabi'atlirigha oxshashla u heqqide héchqandaq melumatqa érishelmigen. Bu xapiliqqa berdashliq bérelmigen abdughénining dadisi, péshqedem kent partkom sékrétari abduleziz 2010-yili 10‏-ayning 24 küni elem bilen alemdin ötken.