5-Iyuldin kéyin iz-déreksiz ghayib bolghanlar (22)

Ghayibning ismi imin mömin, 2009‏-yili 28 yash. 6 Yashliq bir oghul perzentning dadisi bolghan imin möminning yashan'ghan dadisi, u ghayib bolghandin kéyin derd-elemde hayatidin ayrilghan. Nöwette uning bir achisi we ayali ürümchide bir tereptin éghir jismaniy emgek bilen tirikchilik qilsa, yene bir tereptin uning iz-dérikini élish üchün hepileshmekte.

RFA/Shohret Hoshur

Imin mömin qurulush ishchisi bolup, u 5-iyul küni ishtin chüshüp öyge kétiwatqanda, atbeyge meydanidiki bir may iskilatning aldida saqchilar teripidin tosuwélin'ghan we tutup kétilgen. Eslide ular bille kéliwatqanlar töt kishi bolup, saqchilar tosuwalghanda ulardin biri yeni inisi arqisigha yénip qéchip qutulghan؛ qalghan ikkisi yeni ikki dostimu tutup kétilip, biri birqanche aydin kéyin qoyuwétilgen, yene biri 17 yilliq késiwétilgen. Emma, imin tutup kétilgendin kéyin héchqandaq uchuri bolmighan.

Uning achisi we ayali sürüshte qilip barghinida, hökümet orunliri bundaq bir kishining tizimi yoqluqini éytqan؛ melum bir orun uni izdeydighanliqini bildürüp tizimgha alghan, emma a'ilisige hazirghiche héchqandaq jawab qayturmighan. Imin möminning achisi ürümchidiki diyentey saqchixanisigha barghanda, bir neper saqchi imin möminning resimini körüp, uni mushu saqchixanida soraq qilin'ghan birige oxshatqanliqini éytqan, emma éniq we késip gep qilalmighan.

Oghli imin möminning iz-dérikini alalmighan yashan'ghan ata, ötken yili derd-elem bilen alemdin ötken. Nöwette uning achisi, ayali we bir balisi ürümchide yashimaqta. Ikki ayal bir tereptin, taziliq ishchiliqi, qurulush ishi we hetta bezide paxta térish qatarliq déhqanchiliq ishliri bilen shughullinip turmush kechürmekte. Yene bir tereptin hökümet organliri, saqchixanilar we qamaqxanilargha bérip ghayibning iz-dérikini almaqta.

Yuqirida 5‏-iyuldin kéyin iz-déreksiz ghayib bolghanlar namliq chatma xewerning 22-qismini anglidinglar. Bügün'ge qeder igiligen melumatlirimizda jem'iy 27 kishining kimlikliri toluq aydinglashti. Bularning 11 nepiri ürümchidin, 9 neper qeshqerdin, 5 nepiri xotendin we 2 nepiri aqsudindur.