Tursunaxun hesen ghayib oghlini tutup ketken saqchini qeshqer yéngisheherde tonuwaldi

2009-Yili 8-ayning 2-küni saqchilar teripidin tutup kétilip, ghayib bolup ketken jüme tursunning a'ilisimu mushu xil so'algha duch kelgenlerdin biri. Jüme tursunning dadisi tursunaxun hesen, ispat teyyarlash üchün oghlini tutup ketken saqchini ikki yil izdigen, axiri mezkur saqchini qeshqer yéngisheherde tonuwalghan. Saqchi bolsa hoduqqan halette, bir qisim zit geplerni qilip jüme tursunni tutqanliqidin téniwalghan.

Jüme tursunni tutup ketken saqchi ikki neper bolup, uning biri xitay, biri Uyghur. Saqchilar eyni chaghda jüme tursunni élip mangghanda, özlirining kimliki we qaysi saqchixanida ishleydighanliqi heqqide melumat bermigen. Shunga tursunaxun, oghlini tutqan saqchini izdesh üchün aldi bilen özi olturushluq mehellining saqchixanisigha barghan؛ emma u bu yerde oghlini tutqan saqchini uchratmighan. Andin u bir taksini kira qilip, ürümchidiki 100 din artuq saqchixanigha bérip, saqchixanilardiki saqchilarning resimlirige qarap chiqqan؛ u yenila izdigen saqchini tapalmighan. U yéqinda, bir ish bilen qeshqer yéngisheherge barghanda, ikki yildin béri özi izdewatqan saqchini uchratqan.

RFA/Shohret Hoshur

U saqchini tonuwalghandin kéyin, derhal ipade bildürmigen؛ u aldi bilen ürümchige qaytip kélip ghayib oghlining resimini élip ayali bilen birlikte yéngisherge qayta barghan. Tursunaxunning ayalimu oghlini tutqan saqchini tonughan we ular, saqchigha oghlining resimini körsitip, oghlini qaysi saqchixanigha tapshurup bergenlikini sorighan. Saqchi jüme tursunning resimini körüp sel jiddiyleshken we özining ürümchige tazilashqa barmighanliqini we yéngi'ériq saqchixanisining bashliqining ürümchige barghanliqini éytqan we ikki kündin kéyin qayta körüshüshni tewsiye qilghan؛ qayta körüshkende bolsa, saqchixana bashliqining ürümchige barghanliqidinmu téniwalghan.

Melum bolushiche, muhemmetjan ablet, qeshqer yéngisheher nahiyisining yéngi'ériq saqchixanisining saqchisi we saqchixanining siyasiy yétekchisi. U ghayib jüme tursunni tutqanliqidin téniwalmaqta. Bir döletning saqchisi, néme üchün özining adem tutushtin ibaret adettikiche bir ijra'atidin téniwalidu? mana bu so'al, ghayiblarning jümlidin jüme tursunning teqdiri heqqidiki endishilerni téximu kücheytmekte.