Мукуйла вәқәсидә өлгән вә яриланғанлардин йәнә бир қисминиң кимлики ашкариланди

Хәритидә хотән гума наһийисиниң орни көрситилгән.

Нәтиҗидә һазирға қәдәр, вәқәдә өлгәнләрдин 6 кишиниң, тутулған бала вә өсмүрләрдин икки кишиниң кимликлири айдиңлашти. Төвәндә мухбиримиз шөһрәт һошурниң бу һәқтә тәйярлиған тәпсилий хәвирини аңлайсиләр.

Һүрмәтлик радио аңлиғучилар юқириқи вә бундин аввалқи игилигән мәлуматлиримиздин қариғанда, вәқәдә өлгән йәттә кишидин 6 нәпири төвәндикичә:

Абдумиҗит сәйдәхмәт, 26 яш, мукуйланиң 19 - кәнтидин;

Бузөһрә сәйдәхмәт, 27 яш, мукуйланиң 14 - кәнтидин;

Абиз сәйдәхмәт, 30 яш, мукуйланиң 19 - кәнтидин;

Һәбибулла абдуқадир, 26 яш, мукуйланиң 8 - кәнтидин;

Бурабийә абдуқадир, 29 яш, мукуйланиң 3 - кәнтидин;

Абликим абдуқадир, 40 яш, мукуйланиң 8 - кәнтидин.

Бу алтә кишиниң исим - памилилиридин қариғанда, уларниң өз - ара қериндашлиқ мунасивити барлиқи вә икки чоң аилигә мәнсуплиқи байқалмақта. Биз йәнә тутуп туруливатқан 5 нәпәр бала вә өсмүрниң әһвалини игиләш үчүн, йәнә бир қисим орунларға телефон қилдуқ:

юқириқи мәлуматлардин қариғанда, тутуп туруливатқан 5 нәпәр бала вә өсмүрниң икки нәпири төвәндикичә:

Мәмәт абликим, 9 яш, мукуйла башланғуч мәктәпниң 3 - йиллиқ оқуғучиси.

Мәмтимин йүсүп, 16 яки 17 яш, мукуйланиң 20 - кәнтидин.

Йәнә ашкарилинишичә, 28 - дикабир күни хитайниң сақчи қисимлири билән уйғур һиҗрәтчиләр арисида чиққан тоқунуш мәйданида, қаршлиқ көрсәткәнләр арисида 6 яшлиқ бир балиму бар.

Һөрмәтлик радио аңлиғучилар, хитай сақчилириға таш атқан бу алтә яшлиқ балиниң вәқәдә өлгән абдумиҗит сәйдәхмәтниң оғли икәнлики мәлум. Әмма униң етип өлтүрүлгән яки һаят қалғанлиқи ениқ әмәс. Һазирғичә ашкариланған өлгүчиләр арисида бир кишиниң кимликиниң техи мәлум болмаслиқи шундақла йәнә, вәқәдин аман қалған 5 балиниң ичидә 6 яшлиқ бириниң болмаслиқи, мәзкур 6 яшлиқ балиниң нәқ мәйданда өлтүрүлгәнлик еһтималлиқини оттуриға чиқармақта.