تۈركىيە خالىسانە بىرلەشمە ۋەخپى تەرىپىدىن ئۇيۇشتۇرۇلغان يىغىندا ئۇيغۇرلار
ﻣﯘﺧﺒﯩﺮﯨﻤﯩﺰ ﺋﺎﺭﯨﺴﻼﻥ
2010.01.22
2010.01.22
RFA Photo / Arslan
يىغىنغا سىياسىي ۋەخپىنىڭ رەئىسى فەخرى سولاك ئەپەندى رىياسەتچىلىك قىلدى. مۇراسىمدا مالتەپە ئۇنىۋېرىسىتېتى ئىقتىساد ۋە ئىگىلىك باشقۇرۇش بۆلۈمىنىڭ مۇدىرى پروفسسور دوكتۇر نازىف گۆردوغان ئەپەندى ئاممىۋى تەشكىلاتلارنى قانداق تەشكىللەش ۋە يۈرگۈزۈش توغرىسىدا سۆز قىلدى.
يىغىندا يەنە، شەرقىي تۈركىستان مائارىپ ۋە ھەمكارلىق جەمئىيىتىنىڭ رەئىسى ھىدايەتۇللاھ ئەپەندى سۆز قىلىپ ئۇيغۇرلارنىڭ نۆۋەتتىكى ۋەزىيىتى ھەققىدە مەلۇمات بەرگەندىن كېيىن، ئاممىۋىي تەشكىلاتنى تەرتىپكە سېلىش ۋە ئىدارە قىلىش توغرىسىدا ئۇيغۇر ياشلىرىنى تەربىيىلەپ بېرىشنى ئىلتىماس قىلدى.
يىغىندا يەنە، ئاممىۋىي تەشكىلاتلارنى قانداق تەشكىلەش ۋە ئاكتىپ ھالغا كەلتۈرۈش توغرىسىدا ئىلگىرى ئېچىلغان 8 ھەپتىلىك كۇرستا ئوقۇش پۇتتۇرگەن ئوقۇغۇچىلارغا دىپلوم تارقىتىپ بېرىش مۇراسىمى ئۆتكۈزۈلدى.
تۈركىيە خالىسانە بىرلەشمە ۋەخپى 1994 - يىلى ئىستانبۇلدا قۇرۇلغان بولۇپ، تۈركىيە ۋە باشقا دۆلەتلەردە 100 دىن ئارتۇق ئاممىۋىي تەشكىلات ۋە فوند ئەزاسى بار چوڭ بىر تەشكىلات. بۇ تەشكىلات ئاممىۋىي تەشكىلاتلارنى بىر يەرگە جەم قىلىپ دۇنيادا كۈچلۈك بىر سىياسى مەيدان ھازىرلاش، ئىسلام دۇنياسى دۈچ كېلىۋاتقان مەسلىلەرنى ھەل قىلىش ئۈچۈن خىزمەت - پائالىيەت قىلىپ كەلمەكتە.
شەرقىي تۈركىستان مائارىپ ۋە ھەمكارلىق جەمئىيتى بۇ تەشكىلاتقا 2008 - يىلىنىڭ ئوتتۇرىلىرىدا ئەزا بولغاندىن بىرى بۇ تەشكىلات بىلەن خىزمەت - پائالىيەتلەردە ھەمكارلىشىپ كەلمەكتە.
بىز بۇ قېتىمقى يىغىن ھەققىدە تولۇق مەلۇمات ئېلىش ئۈچۈن يىغىنغا قاتناشقان شەرقىي تۈركىستان مائارىپ ۋە ھەمكارلىق جەمئىيتىنىڭ رەئىسى ھىدايەتۇللاھ ئەپەندى بىلەن سۆھبەت ئېلىپ باردۇق.
يۇقىرىدىكى ئاۋاز ئۇلىنىشىدىن، بۇ ھەقتىكى سۆھبىتىمىزنىڭ تەپسىلاتىنى ئاڭلايسىلەر.